Si Ananias Dy ug Bernard Liu pulos mga empleyado sa managsuong Peter ug Welington Lim. Sa Congressional investigation gitug-an sa duha nga nalambigit gayod sa operasyon sa illegal nga drugas ang managsuong Lim ug gani giasoy pa ni Bernard Liu nga ang kinilo nga shabu nga didto nila kuhaa sa nasud sa Hong Kong adto nila isulod sa golf bag ug sa pagtugpa nila sa Mactan Airport sayon ra kaayo nila ang paglusot kay dili sila moagi sa agianan sa mga pasahero nga adunay x-ray machine kon dili adto sa dapit nga wa nay mohiling kanila. Pero ang tanan nga mga pasangil gipanghimakak sa managsuong Peter ug Welington Lim.
Si Ananias Dy nagtago kaniadto sa buhatan sa National Bureau of Investigation apan migawas tungod kay iyang nasabtan nga dili siya luwas sa nahisgutang buhatan. Human niadto wala na masayri sa katawhan ang dagan sa kinabuhi ni Ananias Dy. Mibalik lang pagtunga ang iyang pangalan dihang gibanhigan siya didto sa eskina Katipunan ug Salvador.
Unsa man kaha ang motibo sa pagpatay kaniya? May kalambigitan kaha kini sa iyang pagsaksi kaniadto batok sa managsuong Peter ug Welington Lim o sa lain niyang personal nga atraso. Kon may kalambigitan man kini sa iyang pagsaksi kaniadto batok sa magsuong Lim, si Bernard Liu na kaha ang isunod kaniya? Kutob ra gyod ta ani sa pagpangutana kay wa pa man mahuman ang pakisusi nga gihimo sa atong kapulisan.
Mahatagan unta og tubag sa atong kapulisan kining maong mga pangutana. Ako lang nga panghinaut nga kining kamatayon ni Ananias Dy mahatagan og igong pagtagad ug kasulbaran sa atong kapulisan nga ang iyang kaso dili unta madugang sa listahan sa mga kaso nga gihuptan sa atong kapulisan nga igo lamang gimarkahan og for follow up pero wa diay toy gihimong pag-follow up.
Ang pagpatay kang Ananias Dy bisan man tuod kon wala pa masayri ang motibo niini usa ka dakong mensahe sa pagpanghulga ug nagtisok kini og kahadlok ngadto sa mga tawo nga buot mosaksi batok sa mga nagpayuhot og ginadiling drugas busa kinahanglan nga maalkontrahan dayon kini sa atong kagamhanan ug kapulisan.