Hagit sa edukasyon

Gikagubtan ug gitutukan sa media ang kahimtang sa mga tunghaan sa Sugbo ug sa tibuok rehiyon atol ning unang semana sa pagbukas sa klase. Angayan lang. Tungod kay makahugno paminawon nga ang Department of Education, nga may labing dakong gahin sa nasudnong budget, nag-atubang og susamang problema. Kung kakuwang sa classroom ug sa mga magtutudlo ang problema sa mga milabay'ng katuigan, susamang problema ra gihapon ang gisagubang karon. Mikabat sa kuwatro sientos ka mga magtutudlo ang gikinahanglan sa DepEd sa probinsya sa Sugbo aron makab-ot nila ang tukmang gidaghanon sulod sa usa ka classroom nga kuwarentay singko ka tinun-an sa usa ka magtutudlo.

Makapakutaw sa utok ang sitwasyon sa edukasyon sa Pilipinas. Makadaghan na tang makabati sa mga nasudnong opisyal nga nagpasiatab sa ilang pagsuporta sa pagpalambo sa sistema sa edukasyon sa nasud. Apan ang nakapait kay samtang nagkadugay, nagkaubos usab ang gahin nga gihatag sa sektor sa edukasyon. Usa sa mga nangawot sa dili angayang kawuton mao ang mga state universities ug colleges nga gimantiniran lang og pila ka bilyon ka pisong budget itandi sa mga milabay'ng katuigan.

Gisaway sa grupo sa mga magtutudlo ang administrasyong Arroyo tungod kay matud pa sulod sa iyang pamunoan, wala pa sila makatagamtam og usbaw sa suholan. Matud ni DepEd Regional Director Carolino Mordeno bag-o lang nagtagbo ang mga kadagkoan sa maong departamento ug gihisgutan ang paghatag og usbaw sa suhulan sa mga magtutudlo. Apan lahi ang plano sa aktwal nga paghatag og dugang sweldo sa mga maestro ug maestra.

Apan wala sa mga classrooms ug kahimanan sa tunghaan o sa dagkong suholan ang hagit nga angayang atubangon sa Dep-Ed, apan sa kalidad sa magtutudlo nga anaa ang nasud karon. Mag-unsa man ang hightech nga kagamitan o dakong sweldo kung mismong mga magtutudlo dili pa andam sa mga hagit sa bag-ong panahon? Unsa may bili sa bag-ong mga school buildings kung ang mga magtutudlo walay igong hibawo sa bag-ong mga paagi sa pagtudlo?

Daghang mga punto ang posibleng hinungdan sa pag-ot-ot sa kalidad sa edukasyon sa nasud. Gawas sa mga magtutudlo, angayang hinuklogan sa mga ginikanan ang kadako sa responsibilidad nga gisangon sa ilaha. Unsa may makat-unan sa bata kung human sa iyang klase, walay konsultasyon nga himuon ang ginikanan sa nahibaw-an sa iyang anak sa tungha-an, unsay assignments sa anak ug unsay iyang ikatampo sa bag-ong mga butang nga nakat-unan sa bata. Dugay ra tang nahibawo nga dili sayon ang paghulma sa panghunahuna ug emosyonal nga aspeto sa bata.

* * *

Subo paminawon nga hangtud karon adunay mga tawo nga wala gihapon masayod unsa ka importante ang Pambansang Awit o Philippine National Anthem. Posibleng nahibawo sila apan ila lang gitulon ang ilang respeto tungod ug alang sa komersyalismo. Kung nakapaminaw mo sa usa ka advertisement sa usa ka tunghaan, gigamit ini ang Pambansang Awit. Makadaghang higayon nga gipagawas ang mao nga radio advertisement sulod sa usa ka adlaw nga nigamit sa usa ka kanta nga giisip natong importante ug naghulagway sa atong pagka Pilipino ug kasaysayan sa atong nasud.

Ang nakapait kay konsehal pa sa Sugbo ang tag-iya sa tunghaan nga nagpagawas og radio advertisement nga nigamit sa Pambansang Awit. Kung tan-awon ang Republic Act 8491, wala mahipatik nga gitugot ang paggamit sa nasudnong awit sa mga paid advertisements. Angayang makonsensya ang tag-iya ug mga tawo nga nagpaluyo sa maong pahinumdum sa radyo.