Hunyo 4, 2006: Domingo sa Pentekostes
Mga Pagbasa: Buh. 2:1-11/1 Cor. 12:3-7, 12_13?Jn. 20:19-23
Ang Simbahan sa iyang Pagkatawhanon sa makadaghang higayon, nakasala ngadto sa mga nagkadaiyang hut-ong sa katawhan. Apan bisan pa sa iyang puling ug kahugawan, padayon siyang gigiyahan, padayon siyang namalandong sa mga mahinungdanong isyu sa katilingban. Padayon siyang nilihok sibo sa iyang tahas diha sa pagpangulo ug pabilin siyang naningkamot nga mamahimong instrumento sa Diosnong Grasya pinaagi sa mga Sakramento nga kaniya gitahas sa Dios aron sa katawhan ipaambit. Nahimo siyang nabuhi ug nihimo sibo sa iyang kinaiya pinaagi sa Espiritu Santo. Ang maglilig-on, ang manlalaban ug ang tighupay. Pinaagi sa maong Espiritu ang Simbahan nagpabiling linamdagan niya taliwala sa kadautan ug kahuyangan sa maong simbahan.
Adunay mga higayon nga usahay kitang mga tawo magduda ug malibog. Adunay mga higayon nga bation nato ang tumang kaluya ug kawalay umoy sa mga higayon nga mahan-okan kita sa mga katilingbanon ug personal nga mga isyu sa kinabuhi. Mga kalibog nga nagdala og dakong kahaguka sa pamaagi sa pagpadagang politikal, ekonomikal, ug uban pa. The more nga kita naglibog the more tingali nga angayan kitang mamalandong sa dili pa kita mohimo og mga mahinungdanong mga lakang. Ug atong sangpiton ang giya sa Espiritu Santo aron kita buligan sa mga higayon nga mohimo kita og mga major decisions sa kinabuhi. Dugang pa, ang Espiritu Santo dili lang ma-limitar sa pipila ka mga elite group sa katilingban ug simbahan. Excuse me! Ang Espiritu Santo ania sa matag usa kanato. Ug kay naa man siya sa matag usa kanato nan, angay lang gayud nga siya sangpiton ug aninawon. Mao nga ning pagsaulog nato sa Solemnidad sa Pentekostes atong usisahon kon nahimo ba natong molihok ang Espiritu Santo. Nahimo ba kitang mapamalandongon sa mga nagkadaiyang mga gasang Diosnon inay mahilansang lamang sa mga paglitok sa mga pinulongang dili masabtan? Hibaw-i ang Dios wala na maghisgut pinaagi sa mga tanghaga. Ang Dios mismo migamit sa mga pulong ug kasinatiang tawhanon aron kita makatugkad sa dako og nanghingapin niyang gugma ngari kanato.