Pamalandong matag Domingo
Abril 9, 2006: Domingo sa Lukay/Alay kapwa Sunday
Mga Pagbasa: Is. 50:4-7/Fil. 2:6-11/Mk/14:1-15 or 15:1-39
Sama sa naandan, pagasugdan nato ang pagsaulog sa Semana Santa pinaagi ning Domingo sa Lukay. Diin atong gihandom ang iyang madaugong pagsulod sa Jerusalem ingon man atong gihandom usab ang iyang pagpasakit sa krus. Adunay managsukwahing kahimtang nga atong makit-an ning maong kasaulogan. Ang mahitungod sa kadaugan batok sa trahedya, ang mahitungod sa paglipay batok ang pagsalikway tungod kang Jesus.
Unsa may epekto niini sa atong kinabuhi? Una, ang maong pagsaulog nagdasig kanato sa pagpadayag sa atong pagtuo ngadto kang Jesus. Kini tungod kay ang mga tawo nagtuo man nga siya mao ang Mesiyas. Ikaduhang epekto mao: Ang pagsaulog sa Domingo sa Lukay o ang Domingo sa Pasyon, magdala kanato ngadto sa usa ka paglaom. Nga ang kamatayon nga nahiagoman ni Jesus dili maoy katapusan. Nga ang iyang kamatayon dili diay kapildihan hinunoa, kadaugan. Nga bisan pa man nga ang mga dili maayong mga balita nga atong nadungog sama sa patay, AIDS, aborsyon, ug uban pa, mga butang nga dili maisip nga maoy mobabag kanato sa atong paghamtong ingon nga katilingban ug ingon nga katawhan. Hinunoa, mga panghitabo sila nga nakahatag nato og kaisog nga manlimbasog aron moalagad ug mosapnay sa mga nagkinahanglan.
Ang kamatayon ug ang bisan unsang matang sa trahedya, tinuod maoy niputos sa tagsatagsa nato ka mga kinabuhi. Apan angayan natong matngonan nga bisan pa man niining tanan, mabatonan nato ang kadaugan kini tungod kay nasandig kita uban ang dakong pagtuo sa usa ka tawo ug Ginoo nga mipukan sa dakong trahedya nga mao ang kamatayon. Ug kining maong tawo way lain kondili si Jesu-Kristo atong manunubos.