Niadtong Marso 7, 2006 napatik dinhi niining maong lindog ang mahitungod sa mga badlongon nga mangilog og bagahe diha sa South Bus Terminal sa dakbayan sa Sugbo. Gipakaingon kog isolated case ra kadtong akong nadawat pero nasayop diay ko. Kay sa pagkapatik sa mao kong lindog, nakadawat man kog daghang mga text nga susama rag reklamo bahin sa mangilog og bagahe diha sa maong terminal.
Nasuta nako nga daghan na diay ang nabiktima niining mga tawhana. Nakahatag silag kahasol ngadto sa mga tawo o pasahero tungod kay kon wala pa, wala man untay moreklamo batok kanila. Ang nakaparat pa gyod kay nakadawat kog sumbong nga may pipila sa mga kargador nga mangilog og bagahe nianang maong terminal nga isog kaayo ug manghulga-manghadlok sa mga pasahero.
Usa sa mga text nga akong nadawat nagkanayon: "Duna say nahitabo sa akong manghod diha sa South Bus Terminal. Giilog sa kargador ang iyang bagahe ug gidagan aron ikarga sa nagdagan na nga bus. Nabawo og gukod ang akong manghod. Pagkahuman, na-admit intawon ang akong manghod sa tambalanan kay masakiton man siya sa heart." -- 0916-2502288
Tiaw mo kon unsa ka dako sa kadaot nga namugna niining maong mga badlongon? Naospital god ang ilang gilunggoban og bagahe tungod kay giatake! Kinsa man sab god ang dili atakehon nga kaliton man lang og ilog ang imong bagahe aron ikarga sa usa ka bus nga lumargahay na. Pastilan!
Nia pa gyoy lain: "Good day. Tinuod gyod nga daghang mangilog og bagahe diha sa South Bus Terminal. Mga isog pa kaayo. Ang maayo nga buhaton sa nabiktima o biktimahon pa, dili sila mahadlok kay kon magpakita silag kahadlok, segurado gyod nga makuwartahan sila. Ako bitaw, ilogan unta kog bagahe diha. Han-an bitaw nakog sumbag, aw, atras man lagi. Pero kon magpadala ka nila, mabiktima ka gyod. Gawas pa, naay mga polis diha. Isumbong dayon ninyo ang mangilog og bagahe." -- 0915-7716360
Sakto ang gisugyot sa maong texter. Pero kutob sa mahimo, mas maayong magbantay ug maglikay kamo sa mga tawong mangilog og bagahe diha sa South Bus Terminal.
(Sumbong ug reklamo? Text sa 0910-8105522)