Palihug kamatay sa hustong panahon

Naghinobra ka han-ay kon "organized" ra kaayo ang usa ka padre kura. Mao nga samokan siya sa mga higayon nga dunay mga mohangyo kaniya sa pagpahilog sa ilang mga masakiton. Tungod niini, giplastada sa maong padre kura ang mga mosunod nga skedyul. Butang nga naghatag og kalisang ug kahikurat sa mga parokyano. Ang karatola nagkanayon:

Kon mamatay ka, palihug kamatay ning mosunod nga mga takna: Lunes-Biyernes: Alas nuybe ngadto sa alas dose sa udto. Sabado ug Domingo: Depende lang sa sabot (seguroha nga himuon kini two days in advance!)

Pinirmahan
Padre Kura

Pamalandong

Ang hagit mao nga diha sa kinabuhi kinahanglan usab nga balanse kita ug dili kaayo higpit. Ug kon ang Sakramento na sa Paghilog dili gyud ikalimod ug idili ngadto kang bisan kinsa. Kay diha ra ba sa pagpangalagad ingon nga pari, dili kini malimitar sa usa lamang ka oras kondili sa tanang oras sa parianong kinabuhi.