Si Mangaoang miasoy ning inyong pordoy'ng alagad ang National Bureau of Investigation (NBI-7) nga maoy mosusi sa auction team nga maoy gitahasan nga mobaligya pinaagi sa subasta sa mga relo nga nagbalor unta og P2.6 milyones ang tanan sa wala pa pangawata ang uban niini.
Sa 5,600 kabuok relo nga nalista sa notice of sale, libo kapin ang nawala.
Dili ra ba gyud intawon mahalin kanang karton nga nahibilin, bisan imported pa.
Angayang patubagon usab niining maong anomalosong pagkahanaw sa mga relo si Collector Ernesto Urbano sa Mactan tungod sa pagtugot niya nga adto lamang sa pribadong freight forwarder i-deposito ang maong mga relo nga unta, subay sa polisiya, sa selyadong vault man unta kini sa adwana i-safekeeping.
Awhagon nako ang Ombudsman - Visayas sa pag-apil sa imbestigasyon aron sila maoy mosukad og kaso batok niadtong mga sakop sa auction team.
Walay laing kapaninglan nianang nangahanaw nga mga relo gawas nianang mga sakop sa auction team.
Maayo man og nangamang lang pagawas sa mga karton ang mga Rolex nga relo.
Siyempre, gipangawat gyud kini!
Kun kinsa, kana maoy angayang sutaon sa NBI.
Ipamugos gyud ni Caringal ang iyang kaugalingon nga mabutang dinhi sa Cebu pinaagi sa pagsundot sa sampot sa mga koneksiyon niini sa Malacañang, bisan ang mga lokal nga opisyal, mga broker ug importer, ug ang business community dinhi ug locators sa Mactan Export Processing Zone dili gusto niya.
Sila si Mayor Tomas Osmeña, mga Kongresista Antonio Cuenco, Raul del Mar, ug Nerissa Soon-Ruiz, duha ka broker's association sa Cebu nga Chamber of Customs Brokers Inc. Cebu Chapter ug Professional Customs Brokers Association of the Philippines, League of Municipalities in the Philippines - Cebu pinanguluhan sa presidente niini, Dalaguete Mayor Ronald Alan Cesante, Confederation of Philippine Exporters Foundation (Cebu), Inc. (PHILEXPORT), ug MEPZ Chamber of Exporters and Manufacturers miisyu og statement ug resolution of support alang kang Mangaoang.
Maayong mahibaw-an ni Pres. Gloria Arroyo nga adunay kasong kriminal nga giatubang si Caringal tungod sa pagdawat niini og payola gikan sa usa ka negosyante og panapton pinaagi sa kapin usa ka gatos ka cheke sa bangko.
Ang kaso naka-pending pa sa korte.
Usa pa, hain naman diay kadtong programa ni Arroyo nga lifestyle check nganong wala man mautingkayi sa mga imbestigador sa Malacañang ang gikataho sa usa ka tabloid sa Manila nga P105 milyones nga asset ni Caringal?
Pero, nganong ang Cebu man gyud ang ilogan?
Unsa man ang naa dinhi sa Cebu nga mura'g nag-uros-uros man gyud ang paninguha ni Caringal nga mabutang dinhi?
Bag-o pa lang gani si Mangaoang sa Cebu gusto na ni Caringal nga patiran. Ngano gyud kaha?
Gi-apelar lang sa mga mananagat ngadto sa tag-iya sa Club Pacific nga si Michell Lhuillier nga matagaan sila og agianan paingon sa baybayon aron masayon ang ilang pag-agi paingon ug gikan managat.
Nasayod ko nga malumo og kasingkasing si Lhuillier.
Ang nakadaot lang kay ang sulti sa mga mananagat sa Barangay Binggay ug Kamposong sa Borbon nga "misinformed" si Lhuillier sa iyang gibilin sa proyekto diha sa maong duha ka barangay isip administradora.
Gipasanginlan nila si Sonia Phua nga maoy nagdumili sa paghatag og agianan sa mga mananagat.
Sumala pa ni Paterno Branzuela Jr., tigpamaba sa mga mananagat sa Binggay nga miduol na sila sa kapitan sa maong barangay, sa konseho sa lungsod, ug mismo ni Bokal Agnes Magpale aron ipaabot ilang problema.
Apan nagpabiling wala masulbad ilang suliran.
Nagtuo ang mga mananagat nga si Lhuillier lamang ang bugtong nilang paglaum nga maluoy kanila ug mahatagan sila og saktong agianan paingon sa baybayon.