Aron god sa pagpadugang sa kaanindot sa atong pamantalaan, nahukman sa tagdumala sa Banat News nga dugangan ang mga maglilindog.
Mao nga aron sila mahatagan og luna, gitangtangan og mga adlaw ang Renbor Patrol. Nindot kaayo kay makapahuway ta og pila ka adlaw kay katulo na man lang kini sa usa ka semana.
Nasagmuyo lang hinoon ko kay giputol diretso ang atong lindog nga wala nato mapahibalo daan kon unsay mahitabo.
Kini maoy akong pagpasabot sa akong mga suki nga nanawag kon nganong wala nay Renbor Patrol.
Ang Renbor Patrol mogawas na lang makatulo sa usa ka semana - sa adlaw nga Miyerkules, Sabado ug Domingo. Hinoon, anaa gihapon ang akong Birador nga lindog sa Freeman matag Martes.
Kay ila mang gisupak ang lagda nga gilatid sa City Hall, nagpasabot nga dili na sila magmahay kon dunay operation batok kanila ang mga sakop sa demolition team.
Apan dihang ang mga sakop sa demolition team mihimo na og operation batok kanila kaniadtong Miyerkules, mireklamo ang mga vendors nga badlongon.
Matud nila nga mi-operate lang ang Squatters Encroachment Elimination Division nga gidumala ni Major Vicente Mercado nga wala makigsabot kanila.
Alang kanako, wala na kinahanglana ang sabot-sabot. Nganong kinahanglan pa man ang sabot-sabot nga mga gahi man kaayo mo'g ulo?
Akong balikon, nga ang katunga sa mga naninda og imahen sa mga santos diha sa maong dapit mga buotan og mituman sa lagda. Apan anaa g'yoy mga gahi'g ulo.
Apan sagdi lang, awhagon nako si Gerry Marquez nga iya untang paninguhaon nga makuha ang puthaw nga railings nga gibutang atubangan sa mga tindahan sa mga vendors.
Kay gipasabot man sa mga tindera nga napugos sila pagpalapad sa ilang mga baligya kay tungod sa maong mga railings, dili man makasulod sa ilang tindahan ang mga mopalit.
Maayo tingali nga atong tumanan ang mga tindera. Apan dunay sugyot ni Constantino Amora - usa sa mga vendors - nga human makuha ang puthaw nga railings atubangan sa tindahan, tangtangon kanang gibutang nga extention sa atop.
Kini aron nga mapugos g'yod ang mga tindera nga ang ilang baligya adto ra ibutang sa estante. Sigi, suwayi Ger.
Unya, alang ni Major Mercado, nangutana ka man Sir kon husto na ba ang inyong gihimo, ang akong tubag - kuwang gihapon.
Tambag nako nimo Sir, pagkuha og kopya sa memorandum of agreement nga gipirmahan sa mayor ug sa mga lider sa vendors mga 2002 tingali kadto.
Dunay kopya niini sa City Hall, tingali si konsehal Gerardo Carillo o ang city attorney's office. Tua sa maong MOA ang kasabutan nga hapsay ang pagpaninda diha.
Ang mga wala sa MOA, kuhaa. Lisud kaayo kon kanunay lang kamo nga magbayot-bayot pagpatuman sa balaod. Resulta, hilabihan kasamok sa D. Jakosalem.
Angay'ng hinumdoman nga ang dalan D. Jakosalem - two way nga karsada - og lisud kaayo sa mga sakyanan ang pag-agi sa maong dapit kay milapad na pag-ayo ang maong mga tindahan.