Ug samtang nagbangutan kita, ug samtang nagpadayon konohay ang way kapuslanan nga mga imbestigasyon, atong mahulagway ang pagka-way disiplina natong mga Pinoy.
Atong giingon nga way kapuslanan nga mga imbestigasyon tungod kay, waa kitay ma-pinpointed nga tawo o mga tawo nga maoy nakaingon o maoy responsabli sa maong trahedya.
Kadtong tanan, linugdangan lamang sa pagka-way disiplina natong mga Pinoy.
Sumaa, sa mga tapok-tapok, sa mga okasyon diin daghan ang mga tawo, mag-inilogay gyud ta. Mao man ganiy hinungdan nga gi-uso ang mga priority number, ang pag-linya, aron ma-obtain ang order ug kahapsay.
Alang natong mga Pinoy, maoy atong naandan ang pag-inilogay, ang pag-dasokdasok, ang pagtud-tod, aron maoy makauna, aron di mabintahaan.
Mag-inilogay ta inig-pa-renew nato sa atong driver's license (gawas kon ipaagi nato sa mga fixer); mag-inilogay ta inigpa-validate nato sa mga resibo aron ilisdan og raffle ticket; mag-inilogay ta inig pangompisal ug pangalawat panahon sa holy week; mag-inilogay ta inigpangguwa nato sa sinehan ug sa simbahan (mao man ganiy hinungdan nga ang uban, mouna paggawas, dili pa mahuman ang Misa,kay di gustong maghuot iniggawas.
Mao kini kitang mga Pinoy. Undisciplined ug waay consideration sa uban. "Ako, una sa tanan," mao kini ang atong motto sa kinabuhi.Mao kini ang nahitabo sa Ultra. Resulta kadto sa atong pagka-waay disiplina. Kailangan pa bang imbestigahin yan?