Mangayo og load

Daghan kaayong matang sa text scam nga midagsang karon. Adunay dinagko nga raket. Aduna usay ginagmay lang. Pero dinagko man o ginagmay nga matang sa pangilad, kini nakahatag og puwerhisyo sa atong kaigsuonan. Mao nga angay gayod kining bantayan aron dili modaghan ang kabuang sa mga badlongon sa katilingban.

Usa sa mga text scam karon mao ang pagpangayo og load. Ang estilo nga gisagop ug gigamit sa maong mga badlongon mao ang paggamit sa ngalan sa usa ka (pananglit) sikat nga beautician dinhi sa atong nasud. Magpaila siya sa text nga iyang ipadala ngadto sa prospect nga siya mao ang beautician nga si Pulana.

Ang iyang text ingon niini: "Kung gusto ninyong magpa-beauty, no problem. Three times a week puwede ko na kayong padalhan ng beauty tips. Just send P30.00 worth of load to this number (ang numero sa cellphone sa nag-text.")

Sa higayon nga magpadala ka og P30 nga load ngadto sa numero nga nagpadala kanimo og text, nahasulod ka na sa iyang laang. Human nimo siya kapadad-i og load, wala ka na gayoy madawat nga text gikan kaniya. Dili pod siya mo-reply kon imong i-text. Nakuha na man god niya ang iyang tuyo diha nimo.

Ang kasagaran nga gigamit nga ngalan sa mga badlongon sa katilingban alang niining maong estilo sa modus mao si Ricky Reyes. Sikat man god kaayo si Ricky. Mao nga gisakyan ang iyang kasikat sa mga badlongon sa katilingban. Wala lang intawo'y kasayoran si Ricky nga daghang mga mangingilad ang nakabaton og load sa libreng paagi pinaagi sa paggamit nila sa iyang ngalan.

Usahay usab, dili ngalan sa beautician ang gamiton sa mga mangingilad kondili ang ngalan sa sikat nga mga manalagna didto sa kaulohan. Nasayod na man tingali kamo kon kinsa ang sikat nga mga manalagna sa kaulohan kay nagsulat man usab kana silag kolum sa mga tabloid nga Tinagalog.

May mga higayon nga ang ngalan sa maong mga manalagna maoy gamiton sa mga badlongon sa katilingban sa pag-ilad sa katawhan. Ilang padad-an og text ang ilang prospek ug magpaila nga siya si (pananglit) Madam Auring, Madam Suzette, Madam Rosa o kaha Jojo Acuin.

Sa iyang text ngadto sa iyang prospek, ang suspek mopahibalo nga puyde na siyang motagna sa kapalaran niini pinaagi sa text. Ipa-text lang niya sa prospek ang ngalan, date of birth ug address niini ngadto sa iyang cellphone uban ang P30 woth of load. Kon patulan kini sa prospek ug magpadala siyag load ngadto sa suspek, impas ang iyang P30. Ug dili na lang siya magpaabot nga mo-text pa pag-usab kaniya ang suspek nga nagpailang usa ka manalagna.

(Sumbong ug reklamo? Text sa 0910-8105522)