Ang uban supak sa sugyot ni court administrator Christopher Lock nga magbaton og armas ang mga huwis human sa pagbanhig patay ni Judge Henrick Gingoyon niadtong miaging semana didto sa Cavite tungod kay matud pa di ni tubag sa hulga sa ilang kinabuhi.
Si RTC judge Meinrado Paredes nagkanayon nga di garantiya ang pagbaton nila og armas aron mapapas ang hulga sa ilang mga kinabuhi hinungdan nga di siya pabor nga magdala sila niini gawas sa ilang pinuy-anan. Ingon sab niini ang baruganan ni executive judge Simeon Dumdum.
Duna hinuoy ubang mga huwis nga uyon sa maong sugyot, sama ni RTC judge Gabriel Inglis. Apan si Inglis nagkanayon nga dependi lang kanila kon hilig sila og armas.
Nagka-uyon hinuon ang mga huwis nga di gyud garantiya ang pagdala nila og armas aron way magtinguha sa pagpatay kanila. Apan matud ni Inglis nga makatabang kon duna silay armas tungod kay magsilbi pod kini nga deterrent alang sa nagtinguha sa ilang kinabuhi.
Apan suma ni Inglis kinahanglan pod nga ipaubos og proper training ang mga huwis nga magbaton og armas aron pagsiguro nga sila kamao'ng mogamit niini.
Wa kong kaila personal ni judge Gingoyon, apan basi sa iyang mga higala usa siya ka ligdong nga huwis ug naila sa iyang prinsipyo pagpanalipod sa tawhanong katungod. Nagtubo gikan sa kabus nga pamilya diha sa barangay Ermita ug milampus sa pagpakigbugno sa kinabuhi pinaagi sa kaugalingong paningkamot.
Si judge Gingoyon, sumala pa sa iyang manghod nga si Bebot, usa ka kanhi sakop sa media, nga ang iyang maguwang gusto unta kaniadto nga mamahimong usa ka doktor. Apan tungod sa kakabus ug sa sayo nga pagsulod niini sa kaminyoon sa edad nga 22 anyos nausab ang direksiyon sa iyang kinabuhi ngadto na sa pagka-abogado.
Milampus si Judge Gingoyon sa abogasya diha sa University of the Visayas isip usa ka working student ug naila sa iyang profession tungod sa pagpanglaban sa mga kabus ug linupigan. Usa siya sa mga aktibong sakop sa Free Legal Assistance Group kon FLAG sa wala pa siya matudlong huwis.
Usa sa mga landmark decisions nga iyang nahimo isip huwis diin siya gisuportahan sa labaw'ng hukmanan mao ang pagtugot niya nga motake-over ang gobyerno sa operasyon sa NAIA terminal III gikan sa PIATCO apan mimando usab sa gobyerno nga mobayad ngadto sa maong consortium.
Ang kamatayon ni Gingoyon di lang kawad-an sa judiciary kon di lakip na sa mga kabus nga miila kaniya nga ilang kampiyon.
Ang iyang patay'ng lawas gipaabot nga mahidangat sa Sugbo karong Huwebes sa hapon luwan sa Cebu Pacific diin anhi siya hayaon sud sa upat ka gabii sa dili pa i-cremate ug dad-on pagbalik ang iyang abo ngadto sa Cavite.