EDITORYAL -Daygon ta ang mga bomberong polis

Matawag nga usa ka bayanihong buhat ang gipakita sa mga sakop sa Badian police station sa nahitabong sunog sa karaang merkado sa lungsod sa Badian niadtong milabay'ng Lunes sa kadlawon.

Si Badian police chief Ricardo Orbigozo ug iyang mga sakop bisan wala na sa ilang "job discription" ang pagka-bombero isip mga polis mimaniobra gihapon sa ilang mini-firetruck aron masalbar ang merkado.

Sila maoy nahimong "bomberong polis" sa ilang lungsod nga sukad pa kaniadto wala mahatagig kumpletong ekipo ug bomberong moresponde sa alarma.

Dili lang siguro usa ang namatay ug dili lang P1.5 milyones ang naugdaw kun wala pa molihok ang mga polis niadtong tungura. Angayan usab nga dayegon ang mga sakop ni Orbigozo nga wala mangreklamo sa extra nga trabahong gisangon kanila sa ilang hepe.

Apan kung wala pa kini mahitabo dili maabot sa atensyon sa media nga duna diay daghang mga kalungsuran dinhi sa lalawigan nga walay mga bombero, kung naa man wala poy firetruck, kun duna may firetruck wala say bombero.

Ang mga susamang polis maoy angayang himuong ehemplo sa ubang mga polis sa kalungsuran dili lang sa pagka "bomberong polis" kundili sa ubang paagi aron maibanan usab og gamay ang bati nga panglantaw sa publiko kanila.

Show comments