May nangyari roong wari’y kakaiba
At ito’y naganap kami’y pauwi na
Sakay ng eroplanong nag-stopover pa!
Mula Xiamen Airport kami’y naglalakbay
Patungong Maynila maraming kasakay;
Nasa airborne kami’y biglang naramdaman
Na ang eroplano’y gumagalaw-galaw!
Kumakalug-kalog, mahina’t malakas
Kaya ang puso ko’y waring nagpipiglas;
Lalo pang nangamba:Captain ay nangusap
Ibabalik kami sa minulang s’yudad!
Nang mag-landing kami’y agad na dumating
Ang mga ekpertong gagawa ng repair;
Dalwang oras kaming doon ay nabinbin
Bago nakalipad ang delayed na airplane!
Dahil sa nasira ako’y kabang-kaba
Na masira uli ay lumilipad na;
Ang dasal ng puso ngayo’y kakaiba
Dahil siyam kami na magkakasama!
Diyos ko, Diyos ko huwag mo pong itulot
Na kami’y bumagsak sa dagat o bundok;
Ang ibang kasama kunwa’y natutulog
Pero nagdarasal pagka’t natatakot!
Dinarasal nami’y alam kong iisa:
Sana’y makasapit kami sa Maynila;
Sana’y makauwi sa aming pamilya
Na buhay at ligtas sa mga sakuna!
Mga kasama ko’y ang aking maybahay
At dalawang anak kong bunso at panganay;
Tatlo ang apo kong isa’y bagong silang
At tatlo pang iba na kamag-anakan!
Panganay kong anak na dumidiskarte
Kasamang naligtas sa naturang b’yahe
Salamat sa Diyos kami’y nakauwi
Sa pangalwang buhay magpapakabuti!