Apan nunot niining pagdagsang karon sa mga refilling station, misakay usab sa panahon ang mga badlongon sa katilingban. Ila usab kining gigamit sa ilang modus operandi. Partikular nga naghimo niini mao ang mga sakop sa grupo nga Budol-budol Gang.
Sagad tulo ka tawo ang maghimo niini. Maoy paborito nilang biktimahon kadtong mga tawo nga sapian o nagdala og dinagkong kantidad. Ayaw kahibulong kon nganong matiktikan ang dakong kuwarta nga imong gidala niining mga kanahan tungod kay igmat kaayong maniid kining mga tawhana. Mao god kini ang ilang trabaho busa dili na angay kahibudngan.
Sa higayon nga may mapili na silang prospect nga biktimahon, ang usa kanila maoy unang moduol ngadto niini. Larino kaayong motalo-talo ug hanas manulti maong madala gayod sa iyang bulatik ang prospek. Ang estilo mao nga magpaila siya ngadto sa prospek nga usa ka negosyante og refilling station.
Bisan dili mangutana ang prospek apan mohagad siya sa pagtug-an ngadto niini nga nindot kaayo ang maong negosyo kay dako ang kita (income). Dinhi niining higayona nga moduol ang ikaduhang suspek ug moagni sa prospek sa pagtukod og kaugalingong refilling station sa dapit nga gipuy-an niini. Aron gayod mosalig ang prospek, mosaad sila nga motampo (kuno) og puhonan.
Pagkataudtaod, moduol ang ikatulong suspek nga may gibitbit nga bag. Ipakita kining maong bag sa suspek ngadto sa prospect. Puno sa kuwarta ang maong bag. Unya imbitahon nila ang ilang prospect sa pagpangaon sa usa ka mahalon nga restaurant diin adto maplansa ang katibuk-ang plano sa pagpangilad.
Samtang sila nangaon, magbanos-banos pagbulada ang tulo ka suspek ngadto sa ilang prospek. Unya ang tanang estorya mosangko sa pagpanghulam sa usa sa mga suspek og kuwarta ngadto sa prospek. DIli makabalibad ang prospek kay ihatag o ibilin man ngadto kaniya ang bag nga napuno sa kuwarta.
Human ikahatag sa prospek ang dakong kantidad sa salapi nga gipangayo sa usa sa mga suspek, mananghid kini (suspek) nga molakaw kay adunay paliton apan mobalik kini dayon. Magpabilin ang duha ka suspek. Apan pagkataudtaod moapas ang duha ka suspek sa ilang kauban nga wala pa mahibalik.