Unay si Gloria

Haskang paita sa balita ni Pres. Arroyo: Ang pag-ila sa World Bank sa Pilipinas nga mao nay ikaduhang labing dakong supplier sa mga trabahante ngadto sa nagkalainlaing kanasuran sa kalibotan ug nga ang P56 bilyones nga kita sa overseas Filipino workers (OFWs) karong tuiga maoy bugtong garantiya nga ang nasudnong ekonomiya, bisan sa nagbuntaog nga krisis sa ka-lehitimo sa administrasyon, gikan sa hingpit nga pagkahagsa.

Wa bay nakahunghong sa presidente nga ang pagburot sa gidaghanon sa OFWs maoy di malalis nga ebidensiya sa iyang kapakyas paghatag og trabaho sa mga Pinoy dinhi sa atong kaugalingong nataran? Wa bay nakapasidaan niya nga ang pagdaghan sa mga Pinoy nga nanimpad sa langyawng kabaybayonan nagkahulogan nga mas daghang pamilya ang ilang nabiyaan dinhi sa ato? Ug wa bay nakatambag sa presidente nga ang hingpit nga pagsalig sa nasudnong ekonomiya sa dollar remittances maoy nimatuod nga wa katuybo ang iyang gipanghambog nga ekonomikanhong mga programa?

* * *

Si Pres. Arroyo nagsige og pasalig nga kon maghiusa lang ang katawhan pagpaluyo niya, mapalambo niyang ekonomiya ug mahaw-as niyang kinabag-an sa katawhan gikan sa katimawa. Pero unsa may agi nga iyang ikapakita? Ang nabisto bang gipaburot nga koleksiyon sa buhis? Ang gikuwestiyon bang pangangkon sa iyang mga torotot nga padayon ang baskog nga pagtubo sa nasudnong ekonomiya?

Unsa may sukaranan sa gisaad ni Arroyo nga mas sanag nga kaugmaon? Ang makapabuktot ba nga mas pinalapdan pang value added tax (VAT) nga iya gyong gipamugos nga ipatuman sugod sa Nobiyembre 1? Mangugat ba gihapon siya nga mosaka ang koleksiyon sa VAT bisan sa makauuwaw nga pagtidlom sa koleksiyon sa buhis human umintohi ang "sin taxes" para sa mga produkto sa bino ug sigarilyo?

Unsaon man paglantugi ni Arroyo sa abundang mga tilimad-on nga ang padayon niyang pagpilit sa puwesto magkahulogan lang og dugang kalisod ug kaguliyang sa nasud ug sa katawhan?

* * *

Ang paboritong abat-abat sa administrasyong Arroyo mao nga ang padayong mga protesta sa kadalanan nga nag-awhag sa pagpalagpot niya gikan sa Malakanyang moresulta sa duguong kagubot ug makapasamot og patibugsok sa ekonomiya. Pero di malalis nga ang tanang karambola sa mga protesta gipasiugdahan sa kapolisan nga way kukaluoy nga nigamit og puwersa batok sa malinawon nga mga demonstrador. Ug ang gipanghadlok nga pagtibugsok sa ekonomiya gipanghimakak ra sab sa mga numero nga gipagawas sa gobyerno.

Pero ang mas lawom nga pagsuhid magpakita nga ang mga protesta di maoy nakapaislag sa mga negosyante kon dili ang padayong pagsiaw sa pangurakot sa tanang ang-ang sa gobyerno, kakuwang sa infrastractura ug ubang batakang kahimanan paghimo sa nasud nga mas madanihon para sa lokal ug langyawng mga negosyante ug ang way kinutobang pag-usab-usab sa mga lagda sa negosyo.

* * *

Email: leo_lastimosa@abs-cbn.com