Gustong mag-polis

Dunay nangutana nako unsaon niya pagsulod isip polis nga ang iyang edad subra na man sa 30-anyos.

Aron mahatagan og katin-awan ang naglibog niyang huna-huna, gibuksan nako pagbalik ang akong libro nga nagbatbat sa Republic Act 8551, ang New Police Act of 1998.

Ang section 14 ( j ) sa maong balaod naglatid nga ang dawaton sa pagka polis kinahanglan nga ang edad dili ubos sa 21 ug dili mosubra sa 30.

Wala kini malilong sa tawo nga nangutana nako apan nagpakisayod siya unsa kuno'y "waiver" nga madawat gihapon siya pagka polis bisan og nag-edad na siya og 31 sa pagka karon.

Ang section 15 sa Republic Act 8551 naglatid nga ang edad, height, weight ug educational requirements mahimong i-waive kon minus kaayo ang mangaplay sa pagka polis og dili makaabot sa quota.

Apan kinahanglan nga dili usab mosubra sa edad nga 35 kadtong mo-avail sa waiver. Dinhi hinoon sa ato, mag-ilogay man gani ang mangaplay sa pagka polis, mora'g dili kaayo nimo magamit ang maong matang sa waiver kabahin sa edad.

Daghang matang sa requirement nga mahimong i-waive. Ang atong gihisgutan mao ra ang edad, dunay waiver sa educational attainment, gitas-on ug gibug-aton.

Kon duna ka hinoo'y abilidad sama sa musician diin tagsa ra kaayo ang maantigo, posible ka nga madawat. Duola lang ang mga opisyal sa National Police Commission.

* * *

Nakadawat usab ko og suwat kagahapon gikan sa usa ka lumulopyo sa sitio Suba, barangay Centro, Tubigon, Bohol.

Si Rogelio Ferrer - kana kon tinuod man niya kini nga ngalan - nagreklamo sa pagkatap na sa mga illegal drug pusher ug sa sugal nga masyaw sa ilang dapit.

Mipadangat og reklamo si Ferrer dinhi sa Renbor Patrol kay gipahibalo na niya kini ngadto sa kapolisan apan wala g'yod kuno aksyoni.

Aw, ingon g'yod ana Mr. Ferrer. Dugay man gani silang moaksyon kon sakop sa media ang mopadangat kanila og reklamo, unsa pa kaha ang yano lang nga informer.

Pero, padad-i ko og kompletong inpormasyon, ilabi na sa imong giingon nga ang financier sa masyaw diha nga anak sa bata-bata sa dakung opisyal sa lungsod ug higala sa usa ka opisyal sa kapolisan.

* * *

Nalipay ko nga nakabasa sa report nga ma-promote na sa dili madugay ang akong higala nga si Koronel Vic Loot ug matudlo na siya isip fulltime nga provincial police director sa Sugbo.

Tuguti nga akong korehean ang termino sa ubang reporter nga mogamit sa termino nga "permanent" police director.

Walay opisyal nga matudlo nga permanent police director kay dantan og pila ka tuig, balhinon na man sab sila og laing pwesto. Ang tukma mao nga "fulltime" ug dili na "acting police director."

Ang pag-promote ni Loot sa ranggo nga senior superintendent ug isip fulltime na g'yod nga provincial police director sa Sugbo, makapadasig pa g'yod niya nga motrabaho.

Advance congratulation nimo Sir Loot.

* * *

Awhagon nako ang mga ligoy nga opisyal sa barangay nga lihok tawon mo kay gilugwayan baya ang inyong katungdanan hangtud sa Oktobre 2007.

Pagka daghan sa mga opisyal nga wala g'yoy trabaho, kutob ra sa pagtambong og sesyon, unya dili pa g'yod hapit mosalmot sa pagtuki sa isyu.