Kun ang usa ka tawo, pananglitan, ikiha og dautang buhat diha sa iyang trabaho sa usa ka opisina sa kagamhanan, ang maong gikiha mosinggit dayon: "Politika!"
Kun si Tal Pulano nga sumusunod sa usa ka lider sa politika tangtangon sa trabaho ubos sa kamanduan sa mayor (pananglitan), pasanginlan dayon ang politika.
Kun ang usa ka opisyal sa lungsod ilambigit sa usa ka krimen, politika dayon ang basolon.
Kun ang usa ka opisyal sa gobiyerno i-report sa media nga silotan kay nasakpang nangawkaw, pakasad-on dayon ang politika.
Kun makasulti pa lamang ang politika, hayan moreklamo kini kinutlo ang bata sa tv nga nag-ingon: "Ako, ako, ako, lagi na lang ako!"
Sa ato nang giingon sa unahan, ang politika nahimo nang scapegoat -- convenient scapegoat -- sa mga tawo, ilabi na mga politiko, kinsa adunay tulobagon sa katawhan.
Ang politika lang dayon ang pasanginlan kun sila pagasilotan gumikan sa dili maayong buhat nga ilang nahimo.
Hinuon, sa'a sab ni sa politika kay dinhi sa atong nasud nakaangkon naman gud kinig dautang pangan, kun tawo pa kini, kang kansang kredibilidad maayo nang pagka-unlod sa lapok.
Matud pa bitaw ni kanhi Presidente John F. Kennedy sa Estados Unidos: "Politics is not a dirty thing, it is the politicians who make it dirty."