Apan, mga suki, angay kamong magbantay niining sistema sa recruitment karon. Dili man god tanang recruiter mga tarong ikasabot o ikasulti. Ang pagpang-recruit gisakyan na usab sa mga badlongon sa katilingban. May misuon na niini isip medyum sa pagpasalir sa ilang modus operandi.
Dili lang sa siyudad midagsang kining maong tinonto kondili lakip na sa kalungsoran ug kabarangayan. Ang estilo mao nga may duha ngadto sa tulo ka tawo nga motaak sa usa ka partikular nga dapit. Manungko ug manuktok sila sa kabalayan ug makighinabi sa mga tagbalay.
Magpaila sila sa representante sa usa ka kompaniya. May ngalan sa kompaniya nga ilang gamiton nga maoy ilang ipatuo nga sila konektado. Apan nasubay na kini sa usa sa mga nabiktima ug namatud-an nga walay kompaniya nga nagdala sa maong ngalan. Butbot ra diay ang tanan!
Tipik sa estilo sa ilang pagpangilad ang pagpatuo nga nagpangita silag trabahante alang sa ilang kompaniya. Dili sila motug-an kon unsay produkto o serbisyo nga gitanyag sa ilang kompaniya ngadto sa publiko. Basta kay nagtanyag (kuno) og dakong suweldo ang maong kompaniya. Pasabton usab nila ang ilang prospect nga may usa ka semana nga orientation ang mga aplikante aron sila masayod sa ilang mga gimbuhaton. Tag P18,000 kuno ang buyna-manong suweldo.
Kinsay dili maikag niini? Mao nga daghan ang nadani sa ilang tanyag. Sa higayon nga may motukob na sa ilang bulatik, anhi na sila mopasalir sa ilang tinonto. Pangayoan dayon nila og P250.00 ang prospect alang kuno sa pag-process sa ID niini. Dili kuno puydeng motambong sa orientation kadtong wala pay ID.
Mao nga mobayad ang ilang prospeck og P250.00. Human makabayad ang biktimahonon, ila kining hatagan og claim stab. Ipahulat lang og usa ka semana kay ila nang ihatod ang ID. Tuod man, ihatod gayod tinuod ang ID segon sa gidugayon nga gitagal. Siyempre, malipay ang prospek kay may ID na siya.
Moingon dayon ang mga suspek nga maghulat na lang ang prospek og tawag alang sa iyang orientation. Apan maputi na lang ang mga mata sa prospek sa pagpinaabot, walay bisan multo na lang nga mopahibalo kaniya nga mag-orientation na. Kay kadto pangilad man lang. Ginagmay ra tuod ang maong pangilad. Pero pila man kaha ka tawo ang makolektahan nilag P250.00 sa ilang pagpangilad? Busa pagbantay...!