Liwat sa amo

Sa makausa pa, gipamatud-an ni Presidente Arroyo nga di madutlan sa balaod ang iyang mga guwardiya nga nanghasi sa Sugbo. Tulo na ka adlaw human ang duha ka sakop sa PSG hubog ug way lisensiyang nagmaneho sa di ilang sakyanan, hapit makaligis sa Pasil, nakabangga og duha ka sakyanan, nakaangol og lima ka pasahero ug nisuway pa gyod pagsibat, wa pa gyoy kasong napasaka batok nila.

Kinsa man tuoy maghilas-hilas pag-awhag pagukod sa duha? Kon nakalusot ang ilang amo sa pasangil sa pagpanikas ug pagpangawat, nganong apikihon mang paghubog-hubog ug pagka way lisensiya?

* * *

Dad-on namo karong adlawa paingon sa Bohol ang ikaduhang hugna sa hinabang sa mga Sugbuanon para sa mga biktima sa nagpadayong pagdahili sa yuta sa Mayana, Jagna. Ang hinabang naglakip sa sinakong bugas, kinarton nga sardinas, corned beef, noodles ug sabon.

Segun ni Mayor Exuperio Lloren sa Jagna niabot nag 176 ka pamilya ang naigo sa lapad nga dahili. 69 nila ang nawad-an sa ilang mga panimay, samtang ang nahibilin nawad-an sa ilang mga umahan.

Pero ang labing pait mao ang ka-way klaro kanus-a mahuman ug asa kutob ang talagsaong pagdahili sa yuta. Bisan ang mga eksperto sa Mines and Geo-sciences Bureau sa DENR wa pa sang katino sa hinungdan sa misteryusong paglihok sa yuta.

* * *

Samtang nalipay sa mga hinabang nga nadawat sa mga biktima gikan sa mga Sugbuanon ug ubang nagpakabanang mga grupo, nabalaka si Lloren unsay dangatan sa mga biktima kon mohunong na pagpangabot ang mga hinabang. Maong karon pa lang, iya nang giawhag ang mga biktima sa pagpangita nag alternatibong mga panginabuhi.

Ang nakanindot mao nga ang munisipyo nangandam na para sa umaabot. Nangita na si Lloren ug ubang opisyal og luna nga igong kabalhinan sa mga molupyo ug katukoran sa bag-o nilang mga panimay. Nagplano ang Gawad Kalinga ug ang National Disaster Coordinating Council di lang sa pagtukod sa mga panimay kon dili sa pagtukod sab og community sa mas responsable ug mas kugihan nga mga molupyo.

* * *

Haskang paita ni Kongresista Antonio Yapha. Kuwestiyonable nang daan ang misteryuso niyang pagpalta sa makasaysayanong botasyon sa Kongreso sa impeachment ni Presidente Gloria Macapagal-Arroyo, nisamot pa gyod siya og unlod tungod sa nagkatuiris niyang katin-awan.

Ang iyang pasangil sa diarrhea ug pagkabara sa trapiko paingon sa Batasang Pambansa niadtong Martes sa hapon kadudahan tungod sa managlahing mga detalye nga iyang gitug-an sa nagkalainlaing mga sakop sa media nga nakighinabi niya. Labawng nagkasungi ang mga detalye sa gitug-an ni Yapha nga mga tawag ni Presidente Arroyo niya sa telepono.

Ang labing makapahibung mao ang pagpalyar sab sa iyang telepono ug ang ka-way kasayuran sa iyang upisina unsay baruganan ug kon may giandam na bang diskurso para sa kongresista.

* * *

Email: leo_lastimosa@abs-cbn.com