Samtang ako nagsud-ong kanila, misantop sa akong alimpatakan nga ang estado sa politika ang Pilipinas karon miunlod na pag-ayo diin miabot na sa punto nga ang atong mga politiko nahisama sa mga iro.
Kini tungod kay sige sila og paghot bisan lamang sa ka gamay sa kisaw sa mga init nga isyu sulod sa Balay Balauranan. Nawala na ang ilang delicadeza sulod sa sagradong hawanan sa Kongreso.
Sa atong mga politiko karon, wala na koy nakitang kalidad sama sa mga banggiitang lideres sa kanhiay'ng panahon. Dili na nato makita ang sama kanila ni Ninoy Aquino, Jovito Salonga, Doy Laurel, Claro Recto ug uban pa nga maoy nagdala kaniadto sa lamparahan sa ugma ning atong nasud.
Apan karon, ang klase sa atong mga politiko dako kaayo og kausaban. Kulang sila sa determinasyon pag-aswat sa nasud ngadto sa kalamboan tungod usab sa nagpasulabi nilang personal nga interest.
Tungod siguro kini sa atong kultura diin ang mga politikanhong dinastiya maoy midominar sa atong nasud sulod na sa pipila ka mga dekada. Ug karon padayon hinuon ang paglambo niining mga dinastiya nga mora'g dili na sila mapapas sa eksenang politikal sa nasud.
Sa atong makita karon, kadaghanan sa politiko mga asawa ug anak sa mga ilado na kaayong pamilya sa natad sa politika. Daghan kanila ang migamit sa politika nga mora'g tipik na kini sa ilang mga negosyo nga dili g'yud angay nga bulagan.
Apan ang nakakuyaw sa dinastiya mao nga ang ilang paghalog sa politika gisuportahan sa tulo ka mga butang - "guns", "goons" and "gold" - nga maoy nagmintinar sa ilang pagkapyot sa gahom. Dinhi sa Pilipinas, kon aduna ka niining tulo ka butang, siguradong anaa kanimo ang gahom.
Mao nga ang klase sa uban natong lideres karon minus og kahibalo pagtugkad sa mga sintimento sa katawhan tungod kay una sa ilang mga agenda ang personal nga interest sa ilang pagka-politiko. Tungod lagi kay nagkulang sila sa pagserbisyo sa katawhan, nawad-an na usab og maayong direksiyon ang dagan sa atong nasud uban sa ekonomiya nga maayong pagkalukapa.
Ang kaguliyang karon nagpakita lamang sa grabeng taya nga mibulit sa politikanhong aspeto sa proseso sa demokrasya sa nasud. Ug lisod na kini nga mapapas karon gumikan usab sa kinaiya sa atong mga lideres kinsa walay laing tumong kondili ang pagmintinar sa ilang personal nga interest.