Kini mao ang pag-dub og Binisaya sa mga sulti sa mga artista kang kansang orihinal nga sinultian mao ang Tinagalog.
Ang katuyoan sa tv network - ang GMA-7 kun Kapuso network - mao, sa among pangagpas, ang pagpakita niini sa ilang dakung tinguha nga kahatagan pa gyud og dugang kalipay ug katagbawan ang ilang mga fans sa Sugbo. Ug aron maka-relate sab sila sa Sugbuanong komunidad.
Apan nasayop sa ilang tinguha ug hunahuna ang maong tv networks kay daghang mga suki nila ang wala mahinangop sa dubbing nga ilang gihimo. Kami dinhi sa BANAT NEWS, pananglitan, nakadawat og daghang text messages diin gipadayag sa texters ang ilang kahimangod ngadto sa ilang paboritong network tungod niining dubbing-dubbing nga gihimo.
Ang maong objection sa ilang mga suki nakaabot na tingali sa kadagkuan sa Kapuso network kay nakahukom na man kini nga undangon ang pag-dub ngadtos Binisaya sa mga Tinagalog nga sulti sa mga artista sa nagkadaiyang teleserye.
Tungod niining hukom sa GMA-7 angay silang daygon ug pahalipayan kay kini nagpakita sa ilang pagpaminaw ug pagsanong sa kagustohan sa ilang mga suki kun mga Kapuso. May puso gyud diay ngadtos ilang fans ang Kapuso network!