Kining problemaha sa atong kalungsuran kanunay gayud nga hisgutan kung ang usa ka lungsod mag-atubang og suliran kabahin sa kalinaw ug kahusay.
Ang ideal gayud unta nga ratio sa polis tali sa lumolupyo sa usa ka lungsod mao ang 1:500. Sa ato pa usa ka polis ang gikinahanglan kada 500 ka lomulopyo.
Apan adunay mga lungsod dinhi sa ato diin pipila lang ka polis maningkamot sa pagmentinar sa kalinaw ug kahusay alang sa libuan ka mga residente sa maong lungsod.
Ang Cordova, pananglitan, adunay populasyon nga 40,000 apan aduna ra kini 17 ka mga polis. Ang Compostela usab aduna ray 12 ka polis alang sa populasyon nga 35,000.
Admitido si PRO-7 Deputy Director for Operations S/Supt. Ronald Roderos niini. Kining lack of police personnel usa ka "perennial problem" sa kapolisan ug ang responsibilidad sa pagpasud og dugang mga polis anaa sa kamot sa Kongreso kinsa maoy tighimog budget alang niini.
Nahisgutan man ang kakuwang sa budget, nganong dili man hatagan sa mga kongresista og dako-dakong gahin gikan sa ilang makabungog nga pork barrel ang kapolisan sa ilang mga distrito?
Hunahunaa kuno ninyo kini, mga onorableng sakop sa Kongreso. Basin og ang kasulbaran sa kakuwang sa polis sa kalungsoran anaa ra sa inyong mga pork barrel.