Wala ko magsilbi nga tigpamaba sa mga bus companies kay ang tinuod wala man gani koy kaila nila bisan usa.
Nadunggan man god nako nga daghan kaayo ang mireklamo kay misaka kuno ang pletehan sa mga bus - ilabi na niadtong mga nagpanawan sa habagatang bahin sa probinsya.
Sama sa Dalaguete, sa taud-taud nga katuigan ang mga sumasakay sa maong dapit nagbayad lang og P36 nga pletehan paingon dinhi sa dakbayan - apan sugod kaniadtong Lunes nga gipatuman na man ang tukmang pletehan - ang pletehan miabot na og P93.
Ang tinuod, wala gayod makalapas sa balaod ang mga bus companies kay igo ra sila nga mipatuman sa kamandoan sa Land Transportation Franchising and Regulatory Board nga giisyu sa taud-taud nang panahon.
Ang rason nga sa dugay'ng panahon ubos kaayo ang pletehan sa mga sumasakay sa habagatang Sugbo mao nga nagpohalay ang mga bus companies. Kini aron nga kadtong mga bus nga minus og plete maoy sakayan pag-ayo.
Kaming mga sumasakay sa amihanang Sugbo mora'g dili kaayo angay'ng mabalaka tungod kay kon duna may diskwento nga gihatag ang mga bus companies, pwerte rang gamaya.
Ang Bogo ug San Remigio nga ang gilay-on subra sa usa ka gatus ka kilometros moplete man og mga P100.
Nasabtan nako nga ang rason g'yod sa mga bus operators nga nag-operate sa habagatang Sugbo nga mipatuman na g'yod sa tukmang pletehan, mao kining walay hunong nga pagsaka sa presyo sa petroleum products, sama sa krudo ug gasolina.
Sayonan ka nga ang krudo sa pagka karon miabot na og P30.80 ang matag litro. Ang gasolina gibaligya usab sa tag P34 ang litro.
Husto g'yod ang mga militanteng grupo ug kadtong ubang grupo nga misaway pag-ayo sa pagmugna sa Oil Deregulation Law kay tungod niini, ang kagamhanan wala nay gahum sa pagkontrolar sa presyo sa ibaligya nga mga petroleum products.
Ang kadagkoan god sa kagamhanan nagtoo kaniadto nga tungod sa Oil Deregulation Law, ang mga tigbaligya og petroleum products magpohalay og mosangpot kini sa pagminus sa presyo sa ibaligya nga gasolina, krudo ug uban pa.
Apan ang pagtoo sa kadagkoan sa kagamhanan, wala mahitabo. Hinoon, misaka ang presyo sa mga petroleum products. Dunay panagsa nga pagkunhod sa presyo, apan maisip ra nimo nga binuang.
Abi ninyo og ngano, mous-os man tuod ang presyo sa mga petroleum products og pipila lang ka sentimos apan dantan og pipila ka adlaw, mosaka kini pagbalik og mas daku pa ang kantidad.
Tiaw mo, kaniadtong 1998, ang presyo P16 ra, apan karon miabot na og modul-an sa P31 ang litro. Sa ato pa, hapit na modoble ang kantidad. Kana walay labot sa presyo sa mga pyesa sa sakyanan.
Unya dunay reklamo nga pipila ka tagdumala og passenger buses nga mga senior citizens wala hatagi og diskwento.
Aw kana lain na nga isyu. Kasong kriminal ang ilang atubangon kon dili sila mohatag og diskwento sa mga senior citizens.