Samtang makadadayeg kining intensiyon sa Unity for Truth and Justice nga mao ang pagpadagan sa kasamtangang panggobyerno tumong sa pagpahiuli sa maayong burukrasya o pamalakad sa kagamhanan, apan adunay daghang bangag ang ilang argumento ug mga pangutana kabahin sa ilang proposal.
Pastilan, kinsa man ang molingkod sa caretaker council? Matud sa convenors sa maong grupo ideterminar ang membership sa counil pinaagi sa nominasyon, apan dili gani sila makasulti pila kabuok palingkuron sa council ug unsaon pagdumala ang pag-elect sa membership sa konseho.
Klaro ra ba kaayong anti-Arroyo ilang proposal. Sa pangutanang kinsay angay dili palingkuron sa council, ilang tubag kadtong aktibong miapil sa oust-Arroyo (pagpalagpot ni Arroyo) campaign mahimong mo-aplay isip miyembro sa council.
Bawhag! Imbes mo-promote kita og kahiusahan (unity) ug pakighiuli (reconciliation) nag-una-una na hinuon sila og pakig-away. Alang nako, kining Unity for Truth and Justice labaw pa ka political kaw sa mga karaang mga political parties sa nasud.
Kinsay mopili sa palingkuron sa council? Sila? Asa man sila kuha og gahum pagpili sa membership sa council?
Ang labing pangutana: unsay buhaton sa caretaker council?
Ilang tubag mao ang pag-revamp sa Commission on Elections, limpyuhan ang voter's list, i-modernize ang pag-ihap sa mga balota, ug matud nila usbon ang Konstitusyon.
Nayabag na! Wala gani gyud nila hisguti ang ekonomiya nga maoy labing importanteng butang nga angayang tutokan sa mosunod nga mga liderato. Siyaro og wala gyud makabati sa kalisud kining mga convenors niining Unity for Truth ang Justice nga wala man silay plano mahitungod sa natikyaob na natong ekonomiya.
Unsa man kaha ang mabuhat sa caretaker government sa taas na kaayong presyo sa palaliton nga giatbangan sa barato kaayong suweldo? Unsay ilang mahimo sa nagpadayong pagtaas sa presyo sa gasolina ug krudo, nagkamahal nga matrikula sa mga tunghaan, nagkamubo nga sistema sa edukasyon, programa sa kalikupan ug kahimsug, sa mga kabus nga walay gikaon ug walay gipuy-an, etc.?
Kun wala silay matubag niining maong pangutana, dili sayop akong assessment niining grupoha nga labaw pang pamolitika ang gi-apas kay sa nianang mga partido politikal nga nangaraan na away sa politika.
Maayo pay maghilum na lang sila. Imbes seryoso kita pagpangita og maayong solusyon sa krisis sa atong nasud, mag-apil-apil pa gyud ang Unity for Truth and Justice pagduso nianang kataw-anan nilang proposal.
Usa ka kolumnista sa pamantalaan sa nasud mihulagway hinuon sa maong Truth Commission nga usa mohimo na unya og "commissioned work" aron maoy motangdo nga lehitimong presidente si Arroyo, nga wala siya manikas sa miaging eleksiyon, ug uban pa.
Bitaw, nahadlok pud baya ko nga basin unya og dili na mohaum sa katuyoan sa Catholic Bishops Conference of the Philippines (CBCP) ang katukoran niinig Truth Commission.
Nahadlok ang uban kay basin unya og mangomisyon na lang ning Truth Commission, unya kitang nagbantay nila makonsumisyon na lang. Ambot ba uy!
Apan ang kapolisan sa Mandaue misumbalik nga wala man sila moangkong aduna silay hurisdiksiyon sa imported nga tulo ka right-hand drive nga Mitsubishi Delica nga sulod sa container van. Nasakmit nila kini bunga sa traffic violation nga nahimo sa drayber ug nakadawat sila og tawag nga kinawat ang kargamento.
Ang gusto nga mahibaw-an sa mga polis kun aduna ba kini og papeles, miagi ba kini sa Bureau of Customs (BOC) Port of Cebu, ug nga migawas ba kini sa legal nga paagi.
Gi-aplayan og search warrant ang kargamento mao nga nabuksan kadto niadtong Biyernes nga walay presensiya sa taga BOC-Cebu. Misang-at sila og mosyon kay gusto sa kapolisan nga inspeksiyonon og balik nga aduna nay representante sa BOC-Cebu.
Gigabaan! Nakaamgo si RTC Vice Executive Judge Ulric Cañete nga sayop iyang pag-isyu og search warrant kay walay hurisdiksiyon ang korte sa mga imported nga kargamento, mi-deny sa mosyon sa kapolisan ug mimando nga ipa-turnover ang kargamento ngadto sa BOC-Cebu.