Giangkon ni Mrs. Arroyo nga siya nakigsulti sa telepono ngadto ni Comelec Commissioner Garcillano kalabot sa miaging eleksyon.
Miangkon usab siya nga sayop ang iyang gihimo apan kini suma pa niya usa lang ka lapse in judgment.
Kining tanang kasaypanan, suma pa sa Presidente, iyang hugot nga gibasolan uban ang panghinaut nga masabtan siya ug mapasaylo sa nasud nga Pilipinhon.
Human siya nangayog pasaylo, si Presidente Arroyo mipasalig sa katawhan nga maninguha siya nga madoble pa ang iyang pagpaninguha nga makab-ot ang dakong kauswagan sa nasud.
Gidayeg ni Senate President Franklin Drilon ang gihimo ni Mrs. Arroyo sa pag-angkon sa iyang kasaypanan ug sa iyang pagpangayog pasaylo.
Apan lahi ang reaksyon sa mga lider sa oposisyon. Wala nila dawata ang apolohiya sa Pangulo. Gani ila kining gihimong dugang rason sa ilang tinguha nga mapalagpot kini sa katungdanan.
Daghang mga tawo nga atong gipangayoan og reaksyon bahin ning maong kalambuan ug kadaghanan kanila miingon nga maayo tingaling hatagan og "benefit of the doubt" ang Presidente.
Kini mao sab ang among baruganan. Dili tungod kay milaban kami sa Pangulo kundili buot lamang kami makakitag kalinaw ug kahusay sa nasud nga hangtud ning panahona gitaw-og pag-ayo sa politikanhong kagubot.