Human sa pila ka adlaw nga paghiku-hiko, giangkon na gyud sa lokal nga mga opisyal sa Department of Education (DepEd) nga inutil sila sa pag-regulate sa pribadong mga eskuylahan. Igo lang diay sila nga makatawag sa atensiyon sa pribadong mga eskuylahan mahitungod sa kalapasan nga gipasangil batok nila. Apan way mahimo pagpugos sa pribadong mga eskuylahan pagtuman sa mga lagda.
Mao ni ang pait nga kamatuoran nga nahibaw-an sa nagpakabana nga mga ginikanan nga nikuwestiyon sa pagdumili sa usa ka pribadong eskuylahan sa Dakbayan sa Sugbo pagdawat sa ilang mga anak. Tungod lang kay wa sila mobayad sa mga amotan nga ang legalidad ilang gikuwestiyon.
***
Apan naabtan og upat ka buwan ang pakigbisog sa mga ginikanan una giprangkahan sa DepEd nga wa diay silay ikatabang pagkumbinser sa University of San Carlos Montessori Academy (USC-MA) pagdawat sa ilang mga anak. Gipalaom ug gipabalikbalik sa Cebu City Schools Division silang Cardelyne Therese Tecson Pastrana ug kaubanan nga wa hatagi og bisan gamay na lang nga ideya nga di diay silang kapatuman sa mga lagda.
Ang bugtong opisyal nga nakaangkon og kaisog pagtug-an nilang Pastrana nga inutil ang DepEd batok sa USC-MA mao si Dr. Carmelita Dulangon, OIC Regional Director sa DepEd sa Central Visayas. Matud ni Dulangon di silang kabuot kinsay dawaton ug isalikway sa pribadong mga eskuylahan.
***
Sa giisnab niyang mga suwat ngadto sa DepEd ug sa kadagkoan sa USC, gipasanginlan ni Pastrana ang USC-MA sa mosunod nga kalapasan:
• Pagpamugos pagpangolekta sa tinuig nga bayranan sa Parents Teachers Association (PTA);
• Pagpamugos sa mga tinun-an ug mga ginikanan pagpalit og raffle tickets;
• Pagpugos sa usa ka 8-anyos nga tinun-an paghimo ug pagpirma og incident report mahitungod sa pagdumili sa iyang mga ginikanan pagbayad sa PTA; ug
• Pagdumili sa pag-enrol sa labing menos unom ka mga bata tungod lang sa wa pagbayad sa mga bayranan nga nahisgutan sa ibabaw.
***
Gisublisubli pagpasabot ni Education Secretary Armin Luistro nga boluntaryo ang tanang bayranan, nga bisan ang gitugotan nga mga bayranan di mahimong ipamugos sa mga tinun-an, nga kinahanglan nga di mangolekta og bisan unsang bayranan atol sa enrolment ug nga ang mga ginikanang opisyal sa PTA, di ang mga magtutudlo ni ang mga eskuylahan, ang mangolekta sa mga bayranan.
Alang ba lang diay sa publikong eskuylahan kining maong lagda? Unsa may atraso sa mga ginikanan sa mga tinun-an sa pribadong mga eskuylahan nga wa man sila hatagi sa samang panalipod? Kon padayong mangiyugpos ang DepEd, unsa may dag-anan sa mga ginikanan ug mga tinun-an kon luukon ug yatak-yatakan sila sa pribadong mga eskuylahan ug unsa may makapugong sa mapahimuslanong mga eskuylahan pagpanguwarta ug pagdaugdaog sa ilang mga tinun-an?
***
Email: mailto:leo_lastimosa@abs-cbn.com