Dalaygon baya ang gihimo ni Gobernador Gwen Garcia nga paghatag kanunay og paniudto sa mga reporters nga anaa madestino sa Kapitolyo.
Daghang sakop sa media ang nangalipay niini kay makadaginot man sila nga inay mogasto pa og para paniudto, libre na basta mo-cover sila sa Kapitolyo.
Apan atol sa Broadcasters Congress nga gipasiugdahan sa Kapisanan ng mga Brodkasters ng Pilipinas kaniadtong Dominggo, gituki kini sa mga magsisibya.
Si Atty. Ruphil Bañoc nga manager sa DYHP mipasabot nga dili maisip nga kwestyonable kon panagsa ang media tunolan og makaon sa ilang mga news source.
Apan kon himoon kini nga adlaw-adlaw na lang g'yud, mora og maisip kini nga paagi aron dapigan sa mga reporters ang naghatag kanila og pagkaon.
Matud ni Vice Governor Greg Sanchez dunay ubang reporters nga nadestino sa Kapitolyo nga mokuha og reaksyon kaniya sa pamahayag sa gobernador klaro kuno kaayo nga bayas.
Usahay kuno matud ni Sanchez ang ubang reporters daw naghimo na og "cross examination" kaniya ug moinsister g'yud nga tinuod ang gisulti ni Gwen.
* * *
Apan tinuod ba gud nga ang Commission on Audit (COA) mitataw miklaro nga dili sayop ang pagpakaon sa mga bisita ug sa mga reporters?
Gibutyag sa gobernador nga ang budget sa pagkaon nga gihatag sa media didto gikuha sa gahin sa Provincial Administrators Office.
Ang gigahinan g'yud kuno sa maong mga pagkaon mao ang mga bisita sama sa mga mayor sa kalungsuran nga moadto sa Kapitolyo, apil ang mga consultants.
Binuang. Nganong mogasto pa man g'yud ang Kapitolyo sa pagpakaon sa mga mayor nga daghan man kana sila'g kwarta?
Ang mga consultant dagko usab og sweldo o honoraryom. Kon mao kana, mas maayo pod diay nga apilon pagpakaon ang mga kawani nga gagmay ra'g sweldo?
Kon ako ang kuhaan og sugyot, mas maayo pa nga ang kwarta para sa paghatag og pagkaon sa mga "bisita" apil sa media, ipalit nila'g mga tambal para sa mga district hospital.
Tan-awa ra gud ang atong mga district hospital, dili makaatiman og mga pasyente bisan og gisakitan lang sa tiyan. Paita. Unsaon, kuwang kini og kahimanan ug mga tambal.
* * *
Kon ang mga opisyal sa dakbayan sa Sugbo motuman g'yud sa balaod, walay epekto ang paghatag og pasiunang bayad sa buhis sa mga magpapatigayon.
Dili g'yud diay mahimo nga gastohon paghurot ang P50 milyones nga advance tax payment nga gibayad sa SM City ngadto sa dakbayan.
Dunay lagda ang Commission on Audit (COA) nga ang koleksyon sa buhis para karong tuiga mao ra g'yud ang mahimong gastohon.
Sa ato pa, bisan og ang SM City mibayad og pasiunang buhis ngadto sa dakbayan sa Sugbo alang sa ilang buhisanan, apan dili diay kini magasto paghurot.
Supak usab diay si Mayor Michael Rama nga mohatag ang mga magpapatigayon og advance tax payment ubos sa kondisyon nga gastohon ra kini para paghatag kanila og pabor.
Ang SM City mihatag og kondisyon nga ang ilang advance tax payment gastohon lang pagpaayo sa karsada duol sa ilang tindahan ug pagpalambo sa Mahiga Creek.
Gusto diay ni Rama nga ang buhis nga ibayad sa mga magbubuhis dili kay gastohon lang sa ilang lugar.
Nagkasumpaki niini ang baruganan nila ni Rama ug ni kanhi mayor nga karon Kongresista na nga si Tomas Osmeña.
Si Osmeña maoy midasig kaniadto nga ang mga magpapatigayon mobayad og advance tax unya sila ang makabuot unsay gastohan sa ilang gibayad.
Mao diay kini ang rason nga bisan og taud-taud na nga ang SM City mibayad og advance tax nga P50 milyones apan wala dayon matagad ang karsada palibot diha sa north reclamation area.
Kon mao kana ang balaod sa COA aw maayo pa nga ang mga magpapatigayon dili na mobayad og advance tax.
Apan nalipay ko kay gipaimbintaryo na kuno ni Rama ang mga karsada dinhi sa dakbayan aron pahibaw-an kon hain niini ang angay'ng hatagan dayon og diha-diha nga pagtagad.
Aw kon gusto mo nga masayod, apil niini mao ang Sikatuna Street gikan sa D. Jakosalem ngadto na sa New Imus Road, bati kaayo.
Pastilan, naa pay lawom kaayo nga libaong sa eskena Sikatuna ug Echavez. Kadto lagi nga magmotor panahon nga mag-uwan unya dili suheto diha, aw tikay-ang g'yud.
* * *
Email: birador_freeman@yahoo.com