Ang report nga napublikar sa mga pamantalaan nga si magpapatigayon Efrain Pelaez nagtinguha paglansar pagka mayor diha sa Lapu-Lapu City wala na kaayo makasurpresa nako.
Nalantawan na man god nakong daan nga kini si Mr. Pelaez duna g'yoy ambisyon nga mosulod og politika mao nga mihimo siya og mga makapaukyab nga isyu sa nangaging mga adlaw.
Dalaygon kaayo ang mga tawo nga morisgo sa ilang kinabuhi sa pagbutyag kon dunay mga hiwi nga binuhatan sa mga kawani sa kagamhanan, apan kon gihimo kini nga dunay nagpahipi nga personal interest, dili maayo.
Makaingon man god ang publiko Mr. Pelaez nga mao diay nga gidaut nimo ang dungog ni Lapu-Lapu City Mayor Arturo Radaza sa giingon nimong pagpamalit og mahal nga computers, kay may plano man diay ka nga molansar pagka mayor sa Lapu-Lapu.
Ang kantidad nga P49,000 nga personal computers, apil na ang computer tables ug uban pang kahimanan nga gipalit sa kagamhanan sa Lapu-Lapu alang sa mga tunghaan dili baya mahal.
Mas mahal pa gani kadtong mga personal computers nga gipalit kaniadto ni Kongresista Raul del Mar alang sa kabarangayan sa Cebu City north district nga ang matag usa nagkantidad og P99,999.90.
Dili ko makamahay niadtong mga nagduda sa kredibilidad karon sa mga imbestigador sa Ombudsman-Visayas.
Abi ninyo og ngano? Kay samtang gi-dismiss sa Ombudsman ang kaso sa giingong "overpricing" sa pagpamalit ni Del Mar og computers kaniadto, miinsister sila nga dunay basihanan ang pag-imbestigar sa mga opisyal sa Lapu-Lapu.
Nakaingon ko nga tungod tingali kini kay ang mireklamo batok ni Radaza ug ubang opisyal sa Lapu-Lapu mao man si Pelaez, ang pangulo sa kahugpongan nga nagpa-accredit isip anti-graft watcher.
Kon imong huna-hunaon, ang pagpamalit ni Del Mar sa computers nga kuwang na lang og dies sentimos para motangkod nga P100,000 ang matag usa, gihimo nga barato pa ang computers niadtong 2003.
Ang P49,000 nga computers nga gikwestyon ni Mr. Pelaez gipalit sa Lapu-Lapu kaniadtong 2007. Kini maoy angay'ng hinuktokan sa mga graft investigators.
Karon nga mipahibalo ka na Mr. Pelaez nga duna ka diay tinguha nga magmayor sa Lapu-Lapu, maayo tingali Sir nga likayan nimo ang makapaduda nga lihok.
Nindot ang imong tinguha Sir nga magmayor kay basin og makatabang ka pagpalambo pa sa Lapu-Lapu, apan magduda man god ang katawhan nga ang imong mga pagsaway sa mga opisyal diha, gitumong aron lang madaut ang ilang dungog, ug makapahumot nimo.
* * *
Ang pagpamahal pag-ayo sa multahan sa madakpang draybers alang nako dili g'yod angay'ng tagdon. Kadtong mga drayber nga motuman lang sa lagda sa pagmaneho dili gayod madakpan.
Apan unsaon, bisan og dagko na ang multahan daghan man gihapon ang dili motuman sa tukmang lagda. Unya, angay ba diay nga kaloy-on kining maong matang sa mga drayber?
Sayonan ka nga bisan og dunay karatola nga "no stopping" anha pa hinuon mohunong tungod g'yod sa gibutang nga traffic signs. Ingon ana ang batasan nga dili maayo ug angay'ng tudloan og leksyon.
Usa ka opisyal sa Nagkahiusang mga Drayber sa Sugbo (Nadsu) miingon nga ang gireklamohan nilang mga drayber mao ang kamahal na sa multahan, wala kuno sila moreklamo nga madakpan.
Ang ilang argumento nga ang multahan gilatid sa Republic Act 4136 ug walay katungod ang LTO paghimo'g kausaban nga walay pagtugot sa kongreso, maisip nga usa ka "misleading."
Ang multahan wala kini gilatid diha sa maong balaod, anaa kini sa mga memorandum circulars sa Department of Transportation and Traffic Code.
* * *
Maayo g'yod nga tinud-on ang lakang sa Cebu City Hall nga kadtong mga tag-iya sa mga PUJ nga wala mamasahero kagahapon, patangtangan g'yod sa ilang prangkisa. Apan nasayod ko nga kutob ra kini sa hulga. Unsaon, walay "political will" ang atong mga opisyal nga mopatuman niini kay mosulod dayon ang isyu sa pamolitika.
Ang maayo mao nga kon mopadayon sila sa paghimo og "strike" padaganan og mga sakyanan sa dakbayan ang lainlaing rota. Unya, bisan og mamiyahe na ang maong mga PUJ, mopadayon gihapon ang mga Kaohsiung buses sa paghakut sa mga pasahero. Sa ingon nga paagi tingali, matudloan og leksyon ang maong mga drayber.
* * *
Email: renborromeo@gmail.com