Nagtoo g'yod ko nga daghan na kaayo sa mga sakyanan diha nga gi-impound ang na-release sa dili makatarunganong paagi. Gawas niini, gipangkawatan pa g'yod ang daghang mga sakyanan.
Usa ka higala nako nga kawani sa Citom mitug-an nga luoy kaayo ang ubang sakyanan kay pangkawatan kini sa mahinungdanong pyesa.
Aw, gikonpirmar kini ni Konsehal Joey Daluz III nga mihimo og inspection sa impounding area sa Citom uban ni Citom executive director Arnel Tancinco.
Dihang nakabisita ko kaniadto, nakita nako ang mga sakyanan, mga motor, awto, passenger jeeps, trisikads ug uban pa, nga nagkatap sa impounding area.
Tinuod ang report nga miabot nako, ang ubang sakyanan kuwang na og mga pyesa.
Sa miaging semana, nahibaw-an nga 12 sa mga gi-impound nga PUJ nga nadakpan kay milapas sa city ordinance 1837, na-release pinaagi sa "fake documents."
Ang polis nga si P02 Leoncio "Yoyon" Canoy maoy gipasanginlan nga nalambigit sa maong binuang, apan gipatubag pa siya sa kadagkoan sa Criminal Investigation and Intelligence Branch.
Kagahapon, si mayor Tomas Osmeña miawhag na ni PRO-7 director Silverio Alarcio nga si Canoy balhinon gawas dinhi sa dakbayan sa Sugbo.
Pero atong klarohon, nga kining tanan, pulos pa lang mga pagduda kay si Canoy imbistigahon pa man sa CIIB.
Ang Pajero nga sakyanan sa among silingang polis gikawatan sa reserba nga gitangkil sa luyo bisan og ang maong dapit hayag kaayo tungod sa sodium lamp.
Kagahapon sa buntag, gitulis usab ang usa ka kawani sa bangko nga nagdala og kwarta nga para ideposito nga gipick-up niya gikan sa usa ka balay-patigayon didto sa D. Jakosalem.
Unya, pagka udto, nagubot na lang ang kaubanan nakong mga reporters kay ang drawer sa among news editor gilungkab ug ang gitipigan nga kapin sa P3,000 gikuha sa kawatan.
Kining mga tawo nga modangop na lang sa pagpangawat mao kadtong mga tapolan. Daghan ko'g mga nailhan nga walay trabaho og nasuta nako nga sila mga ligoy.
Magpabilin ang akong baruganan nga kon kugihan ka lang nga pagkatawo, dili lisud ang pagpangita og trabaho.
Sigurado g'yod ko nga bisan og mataktak pa ako sa akong trabaho diri sa The Freeman, dili gihapon ko mamatay ug makakita ra gihapon ko'g trabaho.
Ang sagad sa mga walay trabaho mao kadtong mga tawo nga ligoy, taspokan ug pirmi lang magsalig sa ilang ginikanan nga makakaon sila makatulo sa usa ka adlaw.
Kadaghang trabaho uy, apan naglibog ko nganong ang uban maglisud pagpangita'g kasudlan.
Hawan na ang maong dapit human kini gidemolis ang mga tindahan atbang sa ospital ug gibalhin kadtong mga naninda's barbecue.
Malapason sa balaud kadtong mga naninda atbang sa ospital. Tiaw mo, naninda sila'g ilimnong makahubog ug nag-operate og mga video karaoke nga makamugna og sama.
Ingon unta niini ang himoon sa mga opisyal sa dakbayan nga ipatuman g'yod ang balaud sa walay pagpinig bisan kinsa pa ang maapektahan.
Ang mga naninda diha sa mga dapit nga iya na sa publiko, nasayod na unsay mahitabo kanila sa umaabot nga higayon.
Sama aning tindahan og mga pagkaon diha sa D. Jakosalem, luyo sa Cathedral Church, ang abuhan anaa g'yod sa aseras, unya anha pa manghugas sa aseras.
Hugaw kaayo ang maong dapit. Nganong wala man kini aksyoni sa kadagkoan sa City Hall? Ang Squatters Prevention Encroachment Elimination Division, unsay gihimo? Wala ba mo makakita ani?
Dili lang usa nato ibutyag kon unsa kini nga hotel kay gipasusi pa kini sa City Hall. Mahimong karong adlawa, mahibaw-an ninyo ang kalamboan.