Piliay sa Talisay

Sa labing unang higayon, nagkaabot ang tulo ka posibleng mga kandidato pagka mayor sa Dakbayan sa Talisay. Silang Talisay City Mayor Soc Fernandez, Cebu City Councilor Gabby Leyson ug magpapatigayon Johnny delos Reyes, nga mas naila nga "JVR" nanambong sa Kapamilya Media Forum sa DYAB Abante Bisaya ug Sky Cable nga gipahigayon sa SM City. Ang kamahigalaon sa ilang panagsulti nakapatumaw sa paglaom nga ang umaabot nga piniliay sa Talisay, samtang higpit, magpabiling hapsay ug malinawon.

Sa ilang pagpalili sa dagway sa ilang mga kampanya, si Fernandez mosandig sa iyang mga proyekto pagpalambo sa Talisay ug sa kalimpiyo sa iyang pamunoan; si Leyson mosaad sa pagpadayon sa iyang nasugdan sa kanhi Metro Cebu Development Projects (MCDP) aron di mabiyaan ang Talisay sa ubang bahin sa Metro Cebu; samtang si JVR mosaad pag-una pag-atiman sa mga kabos nga niya pa nangiwit sa listahan sa nangaging mga pamunoan sa Talisay.

* * *

Silang Fernandez ug Leyson nakahigayon pagpanubag sa mga pangutana nga silay mga pahoy sa "proxy war" tali nilang Kongresista Eduardo Gullas ug Cebu City Mayor Tomas Osmeña sa pagkontrolar sa South Reclamation Project (SRP):

• Si Fernandez niingon nga samtang mapasalamaton siyang nakapanunod sa mga proyekto nga gipasiugdahan ni Gullas, duna sab siyay kaugalingong mga proyekto dungan ang pagpanghimakak nga gigawongan ni kanhi city attorney Aurora Econg; samtang

• Si Leyson niingon nga tinun-an pa siya sa kolehiyo nga nangambisyong mag-mayor sa Talisay apan napadaplin ang iyang kandidatura kay gipugngan siya sa mga Osmeña, gawas nga nahigot na siya sa MCDP ug dayon sa Cebu City Council.

Si JVR maoy nakabuylo. Gipasaligan niyang taga Talisay nga samtang kadudahan pa kon kinsay tinuod nga girepresentahan nilang Fernandez ug Leyson, wa nay duda nga ang iyang representahan mao ang interes sa kinabag-an sa Talisay.

* * *

Si kanhi mayor Dehlia Tiu sa Talisay, kinsa mangampanya alang ni Leyson, maoy niluwat sa labing bug-at nga mga sugyot ngadto nilang Talisay City Prosecutor Marshall Rubia ug Talisay City Schools Division Superintendent Carmelita Dolangon, nga nanambong sab sa media forum:

• Angayang hatagan nang mga kandidato, labi na silang taga oposisyon, sa listahan sa mga botante duha ka semana sa di pa ni selyohan aron duna silay igong panahon pagtino nga wa magkasaag-saag ang mga ngan;

• Angayng sayuhon paghingpit ang lista sa Board of Election Inspectors (BEIs) aron masusi sa mga partido tinuod bang way gidapigan ang mga magtutudlo nga moduma sa piliay.

Niangkon silang Rubia ug Dolangon may gamayng problema ang paghingpit sa BEIs. Samtang gitagalan ang DepEd ug ang Comelec hangtod lang sa Pebrero 28 paghingpit sa listahan sa mga sakop sa BEIs, mahimong mausab pa ni human masumiter ang tanang certificates of candidacy sa Marso 29.

* * *

Email: leo_lastimosa@abs-cbn.com