Bawon nga isda

Tungod sa higanteng bulilyaso sa ligid sa ilang kabaw, nga maoy gibasol sa mga maghuhukom nga nakapilde nila sa niaging tuig, ang Lumad Basakanon nabalaka sa ilang bawon nga mga isda karong tuiga. Si kanhi Cebu City Councilor George Rama, ang padrino sa pundok, nipahibawo sa Kulokabildo.Com sa DYAB Abante Bisaya sa Ayala Activity Center nga ang ilang pagkatanggong sa New Imus Road sud sa tulo ka oras niadtong Dominggo nakapahadlok niya nga madubok ang ilang isda, mangalisbo ug mao na say pagpilde nila.

Salamat sa tabang ni Cebu City Vice Mayor Michael Rama, overall chairman sa Sinulog Foundation Inc., nakairog sila sa unahan ug nakahunat pagsayaw sa kadalanan, nga nakahingpit sa ilang pangandam pagpasundayag sa grand stage sa Cebu City Sports Center. Klarong nakatabang ang kalab-as pa sa ilang bawong isda, ang Lumad Basakanon nakasakmit sa ilang ikatulong korona sa upat ka tuig.

* * *

Ang managsuong Norman ug Dennis Navarro, nga maoy mga pangu sa Basakanon, dunay mas dagkong katungdanan nga gihuptan: Si Norman konsehal sa Barangay Basak-San Nicolas; samtang si Dennis kawani sa buhatan ni Cebu City Councilor Edu Rama. Si Norman ang choreographer ug si Dennis ang tigmugna sa makuti ug gikahimut-an nilang dance steps.

Tungod sa pasidaan ni George Rama nga gisunudsunod sa ubang contingents ang ilang sayaw sa nangaging mga Sinulog, silang Norman ug Dennis wa mokumpiyansa. Sa dakong bahin sa niaging tuig, ang ilang mga sakop maoy gidasig sa paghimo sa ilang kaugalingong mga sayaw. Niadto nang Disyembre, usa ka buwan sa di pang Piyesta Senyor, nila gibansay-bansay ang tinagoang dance steps.

Matod ni George ang kasakit sa ilang pagkapilde sa niaging tuig diriyot makapakumbinser nila sa di pag-apil karong tuiga. Apan human nadawat nga igo lang gipatigbabaw sa mga maghuhukom ang mga lagda, giumol nilang sayaw nga gipakpakan sa kaliboan ka Sugbuanon ug mga dumuduong gikan sa sinugdanan hangtod sa kataposan ug nakahatag sa board of judges og sukaranan pag-umol sa unanimous decision paghatag nila sa korona.

* * *

Kay kuwang man sa panahon ug salapi pagbiyahe aron pagtuon sa mga sayaw sa ubang mga dapit, si Dennis napugos pagdangop sa Internet. Buwan sa Mayo siya magsugod pag-umol sa bag-ong dance steps. Nitataw si Norman nga wa pa maabot sa Sinulog ang kinapungkayan sa kalidad sa mga sayaw ug igo lang silang nakasakay sa bawod sa kausaban.

Sama nga yano na karong lingion ang mga sayaw sa mga nag-una nila nga maoy nagsugod sa Sinulog 27 ka tuig nang nilabay, nitino si Norman nga moabot sang panahon sa mga batan-on nga nagsunod nila nga magpadayon pagkaplag og mas tukma nga mga paagi paghubad sa sayaw alang sa Balaanong Bata pinasikad sa kahimtang ug mga panginahanglan sa katawhan sa ilang panahon.

* * *

Email:leo_lastimosa@abs-cbn.com