Labwan si Marco

Gawas sa panglaktod, ang pangandam sa Asean Summit napuno sab sa pagpakaaron-ingnon. Ang lokal ug nasudnong mga opisyal naglumbaay sa pagpakita sa di tinuod nga Sugbo. Ang gusto nilang makit-an sa mga delegado sa summit mao ang Sugbo nga way libaong (labi na sa kadalanan nga posibleng ilang maagian, bahala nang mga suok kon kalunangan na sa kabaw ang mga buslot), way iskuwater (bahala na kon nangligad na sa yuta ang mga molupyo sa mga dapit nga di mahitabong malilian sa mga langyaw) ug lunlon katahom ug kamabulukon (bahala na kon ang mga tanom, mga buwak ug mga kahoy gidalidali ra pagpamalhin og tanom sa center islands sa mga ruta sa summit).

Ang nakapasamot sa eskandalo mao nga bantang ni nilang gihimo atubangan sa kinabag-an sa mga Sugbuanon kansang batakang panginahanglan sa pagkaon, tambal, edukasyon ug mga pinuy-anan way kukauwaw ni kaikog nga padayon nilang gipasagdan.

* * *

Ang pagbaha sa binilyon ka pesos sa pagpa-guwapa sa Sugbo nisukwahi sa pangangkon nga basiyo nang nasudnong panudlanan alang sa mas dinalian ug mas mahinungdanong mga panginahanglan sa kinabag-an. Nakapapas sab sa pangangkon sa mga nagtungkawo sa gahom nga demokratikanhon nang kagamhanan ug nasudnong interes ang ilang gipatigbabaw ug busa, mahimo ba, nga di sila itandi sa diktadura nilang Ferdinand ug Imelda Marcos.

Ang bugtong nilang kalainan sa diktadura nga maisugong gihininginlan sa katawhan kapin na sa 20 ka tuig ang nilabay mao nga mas lapad nang pangawat ug pangabuso karon. Ug bisan sa pagpakaaron-ingnon sa pangandam sa summit, gipalabwan ni Pres. Arroyo ang diktadura.

Sa panahon ni Marcos, igo lang gikoral og gipintalan og puti ang mga barungbarong sa mga kabos aron nga di makit-an ang laksot nilang katimawa. Apan sa pangandam sa umaabot nga summit, ang mga payag-payag gipangguba gyod ug gipalayas ang mga tagbalay bisan way klarong kabalhinan.

* * *

Mas mapuslanon tingali kon inay taphaw nga pamostura matinud-anong kausaban ang pasiugdahan pangandam sa summit karong Disyembre:

• Si Cebu City Mayor Tomas Osmeña inay nga morang ibayaw sa kahimayaan kon dunay maluba ang mga vigilantes angayng maningkamot pagpalambo sa katakos sa iyang kapolisan pagsulbad sa kriminalidad-sama sa pagbadlong nila pagsud sa motels ginamit ang bag-ong mga sakyanan;

• Si Gobernador Gwen Garcia inay magsigeg pangasaba sa mga tawong wa moduko ni magpaawot niya angayng maningkamot pagtul-id sa eskandalo nga ang Sugbo-bisan sa gipanghambog niyang kabantogan ug kaadunahan-mao ray lalawigan nga way provincial hospital; ug

• Si Pres. Arroyo gawas nga tubagon ang makiangayong mga pagduda sa lalehitimo sa iyang mandato angayng mosagakay sa iyang gideklarar nga bag-ong mga bayani nga hapit na mangabuang sa iyang call centers ug gipanglugos ug gipamatay sa ilang mga amo sa nagkalainlaing kanasuran.

* * *

Email: leo_lastimosa@abs-cbn.com