Wa ko kabati ni Jess Vestil nga nagduma og programa sa radyo ni sa telebisyon. Mao nay akong kakuwangan. Wa kong kabasa sa iyang mga sinuwat sa pamantalaan. Mao nay akong kapakyasan. Wa na kong kaabot sa mga adlaw nga aktibo pa siya sa media. Mao nay akong kapildehan.
Nahibawo kong wa ko mag-inusara pagbatyag sa dakong haw-ang sa pahibawo ni Tisha "Inday Tikay" Ylaya sa DYAB Abante Bisaya, nga usa sa pipila lang nga gipahibawo sa Pamilyang Vestil sa nagkalisod nang kahimtang sa iyang panglawas, nga nitaliwan na ang usa sa mga institusyon sa media sa Sugbo.
Pagsugod nako sa radyo kapin na sa duha ka dekada ang nilabay, si Vestil nay among gihangad. Bisan wa mi kabati ni kakita sa iyang trabaho. Akong mga kadungan wa mangahas pagpangutana niya ug ang iyang kamapaubsanon maoy nakapugong niya pagpakigsawo sa iyang agi. Apan way bisan usa nga nagduda sa sulti sa mga nag-una namo nga ang kaligdong ug katakos ni Vestil maoy labing maayong sumbanan sa pagtuman sa among gimbuhaton.
Wa hinuon mi hikawi sa iyang kamanggihatagon. Ang iyang mga gitudlo namo unsaon pagpakighinabi sa mga tinubdan sa balita maoy nahimo nakong sumbahan hangtod karon. Giablihan sab niyang kaliboan ug usa ka libro sa USIS library alang namo. Ug siyay naghikay sa akong una ug bugtong biyahe sa Estados Unidos aron pagpaniid sa mga estasyon sa radyo-gikan sa labing gamay ngadto sa labing dako-sud sa usa ka buwan.
Namatay si Vestil nga nagbilin og dakong katigayonan sa iyang mga sinuwat ug recordings-apil nang "Yutang Tabunon", ang iyang hubad sa nasudnong awit, ang tulo niya ka recordings (Binisaya, Kinatsila ug Iningles) sa "Mi Ultimo Adios" ni Dr. Jose Rizal. Nipasalig ang iyang pamilya nga pakisaw-an nila sa mga Sugbuanon ang bililhon nilang mga kabilin.
Sa pagsulbong sa popularidad ni Brad Pitt, naghimo siyag pelikula uban sa labing bantogang beteranong mga aktor sa Hollywood. Usa nila, si Dustin Hoffman, nikumpisal nga dihang gitapad silang Pitt, "we looked like onions." Nga maoy mahitabo namo kon itapad ming tanan ni Vestil.
Sa niaging buwan, si Grace Rosal Amor niadto sa DYAB Abante Bisaya aron pagtanyag og scholarship o kon mahimo pagsagop gyod sa usa sa mga tinun-an nga nailo sa katalagman sa Guinsaugon. Bisan naapsan sa iyang kamatayon ang paghingpit sa mga detalye sa scholarship program, ang kamanggihatagon maoy tibuok kinabuhi nga bisyo ni Grace.
Nipakita sa iyang haya ang tanang mga tawo kansang kinabuhi iyang nahikap-gikan sa kabataan sa kadalanan ngadto sa kamadrehan, gikan sa mga negosyante ngadto sa napa-eskuyla niyang mga pari, ug gikan sa nagpalabwanay nga mga sakop sa media ngadto sa nagkasungi nga mga politiko.
Email:
leo_lastimosa@abs-cbn.com