Sa ato pa, mora'g tukma ang paghulagway sa uban nga mipahimulos si Mr. Quisumbing sa prebelihiyo nga gihatag kaniya sa kagamhanan sa Mandaue.
Ang mga opisyal sa Mandaue mitugot ni Mr. Quisumbing nga moabang sa luna nga gipanag-iya sa dakbayan sa barato ra kaayo nga kantidad, apan ubos sa kondisyon nga itumong kini sa mga sports activities.
Apan inay nga ang luna gamiton niya alang sa sports activities, gibutangan hinoon ni Mr. Quisumbing og display center alang sa mga baligya nga motorsiklo sa gipanag-iya niya nga Norkis Trading Company Inc.
Basi sa dukomento, nahibaw-an nga panahon ni mayor Demetrio Cortes kaniadtong 1980, si Mr. Quisumbing gitugotan nga makaabang sa 17,432 metros kwadrados - hapit mo-duha ka hektareya nga luna- sa kantidad lang nga P1,000 ang tuig.
Ang luna anaa kini mahimutang sa dalan Plaridel, sakop sa barangay Looc, Mandaue. Pwerteng baratoha no? Tiaw mo P1,000 ra ang abang sa maong luna sa usa ka tuig?
Unya ang kasabotan nga paabangon si Quisumbing sa maong luna sulod sa 25 ka tuig, mahimo pa g'yod nga i-renew kon mo-expire na.
Sa kasabotan naglatid nga ang luna butangan og usa o duha ka tennis court, basketball court, ug himoon kini nga dapit nga bansay-bansayan niadtong magtoon pag-drive og motorsiklo.
Apan kaniadtong 1994 ang kinatibuk-ang luna giibanan og 6,000 metros kwadrados kay gipagamit man sa dakbayan alang sa Department of Education.
Sa ato pa, ang nahabilin sa Norkis mao ang 11,432 metros kwadrados. Kay wala man gamita ni Mr. Quisumbing ang maong luna alang sa sports activities, dunay nagtinguha karon nga ipabawi kini sa dakbayan.
Usa ka kahugpungan sa mga urban poor, kang kansang mga opisyal maoy nagpadala nako og dukomento, buot nga iuli na ni Mr. Quisumbing ngadto sa dakbayan sa Mandaue ang maong luna.
Bitaw, tukma lang nga iuli na ni Mr. Quisumbing ang maong luna nga giabangan niya'g barato kaayo nga kantidad sa dakbayan kay wala man niya tumana ang kasabotan.
Kon dili niya kini iuli, daw sa masabot nga gipahimuslan niya ang pagsalig sa dakbayan ngadto kaniya.
Inay nga public interest, masabot man nga personal interest ang iyang gipatigbabaw kay negosyo man ang iyang gibutang sa maong luna, ang display center sa iyang mga baligyang motor.
Matud sa mga opisyal sa usa ka urban poor group, nga nakadungog ra ba sila nga kini si Mr. Quisumbing nagplano nga molansar og pwesto sa kagamhanan.
Dili kini maayo nga talan-awon sa usa ka tawo nga dunay tinguha nga mag-opisyal sa gobyerno.
Kining maong dapit nga gigamit sa Norkis, tukma kaayo nga maoy tukoran sa Mandaue City College.
Buyno, kon gusto ka pa nga moabang sa maong luna nga imong giukopar karon Mr. Quisumbing, unya gamiton nimo sa negosyo, maayo tingali nga bag-ohon ninyo ang kasabutan.
Kini aron nga dili maalkanse ang kagamhanan sa dakbayan sa Mandaue. Sayonan ka, P1,000 ra ang abang sa maong luna. Ah, wala ra man na sa down payment kon mokuha ta og motor?
Angay'ng patyon ang maong mga tawo. Kon may mas bangis pa unta nga pagpatay kay sa lethal injection, angay nga maoy ipahamtang kanila.
Sayonan ka. Human nila gitulis ang biktima ilang gibanos-banosan paglugos?
Daghan kaayong mga batan-on nga nagsuroy-suroy panahon sa kagabhion ug daghan kanila ang mga sakop og lainlaing fraternity. Daghan usab ang mga batan-ong babaye nga salawayon na ang lihok.
Sa among barangay sa Lorega-San Miguel, daghan kaayo ang ingon niining matanga sa mga batan-on - babaye ug lalaki.
Gani ang usa namo ka konsehal mireklamo na kay anha pa sa barangay hall mag-standby ang maong mga batan-ong babaye.
Bisan karon pa lang, nalantaw na nako og unsay kaugmaon sa maong mga babaye. Aw ang usa gani, 15 anyos pa nag-dancer na man diha sa usa ka bar sa General Maxilom Avenue.
Siya mismo ang mitug-an nako nga usahay maghubo siya inigsayaw. Ang ubang mga batan-on, mouban usab og "date" kon dunay mangimbitar.