Hilanat ni Pacman

Si Rex "Wakee" Salud ug si Manny "Pacman" Pacquiao nagkasuod sa niaging tuig dihang nitambong si Pacman sa promosyon sa boksing ni Wakee sa Lapu-Lapu City. Sukad niadto, sige nang balikbalik si Pacman sa Sugbo ug si Wakee nay iyang kuyog pagtambong sa nagkalainlaing kalihokan, apil nang ilang paboritong mga sabong sa manok.

Bisan bag-o pa silang nagkasuod, si Wakee nay labing sikit ni Pacman sa Estados Unidos, atubangan sa nagbistong linigwatay sa mga sakop sa Team Pacquiao kinsay makasige og hunghong sa boksingero. Gani, si Wakee ray nakatapad ni Pacman ug sa iyang asawang si Jinky sakay sa iyang brand new nga P6.5 milyones nga 2005 Porsche Cayenne sports car (nga gikatahong gipalit ni Pacman kay wa siyay nakit-an nga laing kasakyan) sa ilang biyahe gikan sa California paingon sa Las Vegas.

Ug si Wakee didto sud sa kuwarto ni Pacman sa luho nga Wynn Hotel dihang natawgan siya sa DYAB Abante Bisaya pinaagi sa VoIP technology sa intouch.com.ph.

* * *

Gisubli ni Wakee ang mga argumento nga segurong modaog si Pacman sa ikaduha nilang engkuwentro ni Erik "El Terrible" Morales unyang Domingo:

• Mas kundisyon ang panglawas ni Pacman kay mas matinud-anon ang iyang bansay-bansay kon itandi sa una nilang away ni Morales Marso sa niaging tuig;
• Gisakripisyo ni Pacman ang espesyal nga mga okasyon sa iyang pamilya aron di mabaldang pagbansay-bansay;
• Di magpagutom si Pacman, 27, pagkuha sa timbang nga 130 libras, lahi ni Morales, 29, maglisod na pagpasar sa timbangan sa way pagpuasa sa pila ka adlaw;
• Mas kusganon nang puwersa sa wala ug tuo ni Pacman nga 90% ug 50% ra niadtong Marso;
• Mas nipis nang gloves nga gamiton;
• Mas abtik nang footwork ni Pacman;
• Gibabagan nang mga politiko, mga sakop sa media ug mga magdadayeg paghasol sa pangandam ni Pacman; ug
• Di tinuod nga napiang ang tuong kamot ni Pacman, igo lang kining "gipamaolan" human nakaigo sa ulo sa iyang sparring partner.

* * *

Dihang gitunol ni Wakee ang telepono ngadtong Pacman, hinay ug gaan kaayog tingog ang boksidor nga nagpasalamat sa katawhan sa ilang pagsuporta sa iyang pangandam ug pagpangaliya para sa iyang kadaogan. Nitug-an siya sa DYAB Abante Bisaya nga mas nakaila na siya karong Morales ug busa mas andam ning ikaduha nilang panag-abot.

Daog o pilde, ang Pacquiao-Morales II nakamugna nag hilanat sa Sugbo: Duha ka shopping malls mopasalida sa live telecast ug namaligyag tag-P300 nga tiket (ang usa may pamahaw, ang ikaduha wa), may libreng printa sa Pacman t-shirts, ang ABS-CBN mopabarug og higanteng LCD screens sa delayed telecast ug ang DYAB Abante Bisaya magpasiugda og medical mission ug boxing clinic inabagan sa ALA Gym.

* * *

Email: leo_lastimosa@abs-cbn.com