Gilawog sa dagat

Nakaseguro kong sama sa ubang mabuot nga lungsoranon nagbangotan sab si Bise Mayor Fiel Culpa sa San Ricardo, Southern Leyte sa trahedya nga nihakop sa ilang lungsod atol sa ilang pagsaulog sa piyesta ni Senyor Sto. Niño niadtong Domingo. Pero angay siyang tug-anan sa sakit nga kamatuoran: Usa siya sa sad-an sa kamatayon sa 20 ka molupyo nga nisakay sa overloaded niyang lantsa. Ug bisan gidupadupahan na karon sa iyang kaubanang mga opisyal sa munisipyo, angay siyang patubagon sa bangis nga krimen nga iyang nahimo.

Dihang gipahuwaman ni Culpa ang iyang lantsa ngadto ni Farnacita Torregoza, ang tigpasiugda sa fluvial procession, wa mapapas ang iyang obligasyon pagseguro nga makatuman sa tanang lagda ang biyahe. Ang wa niya pagpaningil og abang wa makawagtang sa iyang responsibilidad pagseguro nga luwas ang tanang pasahero sa iyang lantsa. Ang iyang taas nga katungdanan sa gobyerno maoy nakapasamot sa kabug-at sa iyang tulubagon pagkarga og 204 ka pasahero sa iyang lantsa nga may kapasidad para lang sa 60 ug pagsubay sa ruta nga wa siyay lisensiya.

* * *

Gawas nilang Culpa ug Torregoza, angay sang dakdakan sa tibuok nga gibug-aton sa balaod ang kapitan sa lantsa, si Efren Sanguenza. Atong paabuton unsaon pagpasabot sa iyang marine protest sa iyang pagpasakay sa 204 ka pasahero nga, labaw sa iyang among si Culpa siyay labing nasuhito, kaupat pil-a ang kapasidad sa lantsa.

Laing kakonsabo pagsegurong mahinayon ang trahedya mao ang Philippine Coast Guard (PCG). Sukwahi sa pangugat sa turutot sa munisipyo dihang na-interview sa TV Patrol Central Visayas niadtong Lunes sa hapon, dunay detachment ang PCG sa San Ricardo. Gawas nga wa mananghid ang kapitan ug mga tripulante, ang PCG wa say mga inspektor nga gipada pagsusi sa seaworthiness sa lantsa.

Laing makapugong unta pero nitabang hinuon paghawan sa agianan sa trahedya mao ang sakop sa kapolisan sa San Ricardo, si PO3 Primitivo Gabutan. Matod sa iyang hepe, si SPO4 Benjie Alterado, si Gabutan nga deboto sa Sto. Niño inay mobaraw sa alaot nga biyahe igo lang nikaway-kaway sa nameligrong mga pasahero.

* * *

Karong lab-as pang trahedya, bahaan na sab ta sa pasalig sa PCG, Maritime Industry Authority ug mga politiko nga di na masubli ang katalagman. Pero sama sa naandan makalimtan lang gihapon hangtod sa sunod trahedya nga mahimong sukaranan sa dugang pagarpar.

Kon way mga kawani ang PCG ug Marina pagbantay sa mga pantalan sa mga lungsod sama sa San Ricardo, ilawog na ba lang ang mga pasahero sa pamasin? Nganong di man i-deputize ang local government units aron nga ang mga politiko, sama ni Culpa, inay manglapas mao nay mopatigbabaw sa mga lagda sa kaluwas sa kinabuhi ug kabtangan sa kadagatan?

* * *

Email: leo_lastimosa@abs-cbn.com