MANILA, Philippines - Isang 17-anyos na binatilyo ang binaril sa ulo at napatay ng dalawang hindi pa nakikilalang suspek sa Malabon City kamakalawa ng gabi.
Namatay noon din sa lugar na pinangyarihan ng krimen si Warren Agao, residente ng Santo Niño, Brgy. Baclaran, Pasay City.
Ayon sa ulat ng Malabon City Police, naganap ang insidente dakong alas-7:00 ng gabi sa Mesina St., Brgy. Tinajeros ng nabanggit na siyudad habang naglalakad ang biktima sa lugar nang biglang sumulpot ang mga suspek at walang sabi-sabi itong binaril sa ulo.
Matapos ang insidente ay mabilis na tumakas ang mga suspek.
Ayon sa mga kapatid ng biktima na sina Jhazmine at Princess na sangkot umano sa mga iligal na gawain ang kanilang kapatid at posibleng ito ang naging dahilan ng kanyang kamatayan.