MANILA, Philippines - Patay ang isang 30-anyos na pedicab driver nang mahawakan ang live wire na ikokonekta nito sa kaniyang barung-barong, sa Paco, Maynila, kamakalawa ng gabi.
Dead-on-arrival sa Ospital ng Maynila ang biktimang si Alvin Isip, ng Pres. Quirino Avenue, Paco.
Ayon sa report, dakong alas -8:30 ng gabi nang maganap ang nasabing insidente sa loob ng barung- barong ng nasawi sa ilalim ng tulay ng Estero de Concordia sa President Quirino Avenue, Paco.
Nabatid na nawalan ng suplay ng kuryente sa lugar at mabilis naman umanong naibalik ang suplay sa mga kapitbahay kaya nagtaka ang biktima kung bakit wala pa silang ilaw.
Pinuntahan umano nito ang kapitbahay na si Arturo Marciano JR., 45, para alamin kung bakit may kuryente ito at siya ay wala.
Hinawakan umano nito ang nakakonektang live wire na nagmula kina Marciano patungo sa kaniyang bahay subalit bigla itong nangisay at nawalan ng malay.
Mabilis naman siyang dinala sa nasabing pagamutan subalit idineklarang patay alas-9:05 ng gabi.