Manila, Philippines - Isang bakery helper ang patay habang 3 pa ang sugatan sa walang habas na pamamaril ng isang rider sa lungsod Quezon kamakalawa ng gabi.
Ang nasawi ay kinilalang si Jerry Escotan, 28, ng North Fairview Subdivision, Brgy. North Fairview sa lungsod.
Sugatan naman sina Jim Guansing, 24; Eleazar Malaras, 25, baker; at Juny Sallao, 35, construction worker; pawang mga residente rin sa nasabing barangay.
Hindi naman natukoy ang pagkakakilanlan ng suspect na tumakas makaraan ang pamamaril.
Nangyari ang insidente sa may M&N Sari Sari Store na matatagpuan sa panulukan ng Adrian at Burban St., North Fairview Subdivision ganap na alas-8:30 ng gabi.
Ayon kay Armando Padalapat, security guard ng subdivision, nagbabantay siya sa kanyang puwesto nang makarinig siya ng mga putok ng baril sa naturang tindahan.
Agad niyang tiningnan ang lugar kung saan nakita umano niya ang isang lalaki na sakay ng motorsiklo na tumakas patungo sa Astor St., habang nagtatakbuhan naman sa iba’t ibang direksyon ang mga biktimang sina Escotan, Guansing at Malaras.
Naglalakad naman papauwi ang biktima na si Sallao sa nasabing kalye nang barilin din siya ng tumakas na suspect.
Matapos ang pamamaril ay natagpuan na lang na duguan at walang buhay na nakahandusay ang biktima.
Inaalam pa ng pulisya ang motibo sa isinagawang krimen.