MANILA, Philippines - Isang bangkay ng lalaki na tadtad ng tama ng saksak sa buong katawan ang natagpuan sa may harap ng isang bangko sa lungsod Quezon kahapon ng madaling araw.
Ayon kay SPO1 Randy Bantillo, may-hawak ng kaso, ang biktima na wa lang pagkakakilanlan ay isinalarawan sa edad na 40-45, may taas na 5’1, nakasuot ng puting sando at asul na short pants.
Sinabi ni Bantillo, ang biktima ay nadiskubre ng isang Rommel Bumagat habang nakahandusay at naliligo sa sariling dugo sa harap ng Allied Bank na matatagpuan sa kahabaan ng Aurora Boulevard, corner Lauan St., Brgy. Duyan-duyan sa lungsod ganap na alas-4 ng madaling araw.
Ayon kay Bumagat, naglalakad siya sa nasabing lugar nang mapuna niya ang biktima na nakahandusay at may umaagos na dugo sa ilong.
Dahil dito agad na ipinagbigay alam ni Bumagat ang nakita sa Barangay hall ng Duyan-Duyan na siya namang humingi ng assistance sa pulisya.
Sa pagsisiyasat ng Scene of the Crime Operatives (SOCO) ang biktima ay nagtamo ng multiple stab wounds sa iba’t ibang parte ng kanyang katawan na siyang agad na ikinamatay nito.
Sa kasalukuyan, patuloy ang imbestigasyon ng awtoridad sa naturang insidente upang mabatid ang pagkakakilanlan ng biktima at ang ugat ng pagpatay dito.