MANILA, Philippines - Ipinagmalaki kahapon ni Interior and Local Government Secretary Jesse Robredo na mas handa na sa kalamidad ang bansa dahil sa pinaigting na kakayahan ng local government hinggil sa disaster readiness and prevention. Ayon kay Robredo, ang mga local government units (LGUs), mula probinsya hanggang sa barangay level ay mas handa na ngayon sa mga pagbaha dahil sa patuloy na pagsasanay, pagkakaroon ng maayos na kagamitan, at koordinasyon sa isa’t isa.
Gayunman, giit ng kalihim, ang hamon lamang anya ay hindi lamang sa teknikal na kaalaman ng LGUs, kundi ang maayos na koordinasyon sa mga mamamayan. Hinalimbawa ni Robredo ang Association of Fire Volunteers, Quezon province at DILG Region 2 na bagama’t hindi tinamaan ng habagat ay tumulong naman sa rescue operations sa mga apektadong residente ng pagbaha.
Gayundin ang mga emergency responders, tulad ng Philippine National Police (PNP) at Bureau of Fire Protection (BFP), na halos hindi natulog sa pagtulong sa mga biktima at pamilyang na-estranded sa kanilang mga tahanan matapos salantahin ng pagbaha.