MANILA, Philippines - Aabot sa 16 katao ang iniulat na nasaktan matapos ang banggaan ng dalawang bus sa kahabaan ng Commonwealth Avenue sa lungsod Quezon, kahapon.
Ayon kay PO3 Nicanor Joven, traffic investigator, ang mga sugatang biktima ay pawang pasahero ng Kelly bus (UVN-399) at dinala na sa East Avenue Medical Center.
Nangyari ang insidente sa may south-bound lane ng Commonwealth Avenue, harap ng Sandiganbayan ganap na alas-10 ng umaga.
Katwiran ng bus driver na si Hilario Guadez Jr. sa awtoridad na pumalya ang kanyang preno kung kaya nangyari ang aksidente.
Nakadagdag din umano ang madulas na kalye bunga ng pag-ulan kung kaya nagtuluy-tuloy na siya at nabangga ang hulihang bahagi ng Saint Rose bus na bumabagtas sa unahan niya.
Wala namang nasugatang pasahero sa Saint Rose bus.