MANILA, Philippines - “No future in drugs.”
Ito naman ang binigyan-diin ni Manila Mayor Alfredo Lim sa mga estudyante ng Pamantasan ng Lungsod ng Maynila (PLM) sa katatapos na Drug Abuse Prevention and Education Orientation Seminar.
Ayon kay Lim, tanging edukasyon lamang ang makakapagpaginhawa ng buhay ng isang kabataan katulong ang mga magulang sa pag-abot ng mga pangarap.
“Ang magulang niyo ay may mga pangarap para sa inyo. Pag kayo ay nalulong sa masamang bisyo tulad ng pagdo-droga, maaaring ito ang makasira sa kanilang mga pangarap na kayo ay maging mga professionals, at tuluyan ng masira ang inyong kinabukasan. Huwag sana ninyong biguin ang kanilang mga pangarap”, ani Lim.
Kasabay nito, hinimok din ng alkalde ang mga estudyante na pagbutihin ang pag-aaral hanggang sa makatapos at magtagumpay sa pinili nilang kurso.
“Study, study, study! Yan lang ang tangi kung maipapayo. Huwag magpatukso sa drugs para makatapos kayo sa inyong pag-aaral”, dagdag pa ng alkalde.
Bilang tugon, nagpasalamat naman sa alkade ang mga estudyante ng PLM at nangako rin na susundin ang payo at kanilang isusulit ang nakukuhang turo mula sa nasabing kolehiyo.