MANILA, Philippines - Natagpuan na ng mga awtoridad ang bangkay ng babaeng informant ni SPO2 Teofilo Panlilio na kasama nitong nawawala simula pa noong Sabado at napaulat na pinatay sa Isla Puting Bato sa Tondo, Maynila.
Ayon kay MPD homicide chief, Sr. Insp. Joey de Ocampo, ang bangkay ni alyas Bangenge ay nakita sa baybayin ng Navotas sakop ng Davila St., Brgy. Davila, Navotas dakong alas-10:20 kamakalawa ng gabi. May tama ito ng bala ng baril sa ulo.
Nabatid na natagpuan ng isang Nestor Morales na pedicab driver ang bangkay ni Bangenge na inilarawang pango ang ilong, kayumanggi at pandak.
Kinumpirma naman ni De Ocampo na katawan ni Bangenge ang nasabing bangkay, ayon na rin sa positibong pagtukoy ng isang pulis na nakakita sa biktima na kasama ni Panlilio sa MPD-District Headquarter’s Security Unit (MPD-DHSU ).
Samantala, nakakalap din ng impormasyon ang homicide chief na matapos na patayin ay hinubaran ng uniporme ng mga salarin si Panlilio saka ibinaon ang bangkay sa isang burak na malapit din sa Isla Puting Bato.
Tinutugis na rin ng pulisya ang apat na suspect na nakitang bumaril at pumatay kay Panlilio.
Sa ngayon ay hindi pa maibunyag ng pulisya ang pagkakakilanlan ng mga salarin sa pangamba na makapagtago ang mga ito.