MANILA, Philippines - Dead-on-the-spot ang isang holdaper na matagal nang minamanmanan ng mga awtoridad matapos makaengkuwentro ang mga miyembro ng Manila Police District (MPD) sa Sta. Cruz, Maynila, kamakalawa ng gabi.
Nagtamo ng tama ng bala ng baril sa ulo at dibdib ang suspect na kinilalang si Alvin Ramirez, 20, miyembro ng Sputnik Gang at residente ng Lico St., Tondo, Maynila.
Sa ulat ni Det. Ronald Gallo ng MPD-Homicide Section, dakong alas-10:00 ng gabi nang maganap ang insidente sa kanto ng Rizal Ave., at Samal St., Sta. Cruz.
Sa pahayag ng ilang opisyal ng barangay sa lugar, bago ang engkwentro, dakong alas-9:40 ng gabi nang magkaroon umano ng habulan sa pagitan ng tatlong holdaper na magkakaangkas umano sa isang motorsiklo at mga opisyal at tanod ng Barangay 208 Zone 12, sa reklamong panghoholdap sa isang 22-anyos na call center agent na kinilalang si Ghileen Simbulan Alacon.
Subalit bigo ang mga tanod at opisyal ng barangay na masukol ang mga suspect.
Habang nakatambay sa barangay hall ang mga nanghabol, mahigit 15 minuto pa lamang ang nakalipas nang makarinig ng putukan at nang alamin ay nakita ang mga pulis na sinasabing humabol din sa mga suspect.
Si Ramirez ang tinamaan sa gitna ng pagpapalitan ng putok, habang iniwan naman ito ng dalawa niyang kasamahan na tumakas lulan ng motorsiklo. Positibong kinilala ng biktima na isa ang suspect sa nangholdap sa kanya.