MANILA, Philippines - Patuloy ang pambibiktima ng mga Batang hamog sa Malate-Ermita area sa Maynila kung saan madalas na biktima ang mga turista.
Kahapon ng umaga ay nagsampa ng reklamo kay SPO1 Jonathan Bautista, ng MPD-General Assignment Section, ang pinakahuling biktima ng mga Batang hamog na si Chan Woo, 18, Korean, tubong Seoul, South Korea at nanunuluyan sa Roces, Ave., Quezon City.
Ayon kay Bautista, naganap umano ang insidente dakong alas 2:30 ng madaling araw sa Adriatico, Malate, Maynila habang naglalakad ang biktima kasama ang dalawang kaibigan.
Sinabi ng biktima na sinalubong siya ng tatlong bata na nasa edad 10-12 anyos, pinagkaguluhan at kinuha ang kanyang atensiyon.
Huli na ng malaman ng biktima na nadukot na ang kanyang Galaxy 2 Samsung na nagkakahalaga ng P20,000. Isa umano sa mga batang hamog ang humawak pa sa braso ng biktima at pilit na nanghihingi ng pera.