MANILA, Philippines - Sobrang depresyon at karamdaman ang nagtulak sa dalawang lalaki upang wakasan ang kanilang buhay sa magkahiwalay na lugar sa Quezon City kahapon ng umaga.
Nagkape muna bago tuluyang nakitang bangkay si Leonito Bulalacao, 41, welder, makaraang magpakamatay sa pamamagitan ng pagbigti sa sarili gamit ang nylon cord sa loob ng kanyang bahay sa #4 Bakas Compound, Brgy. Bagong Silangan, Quezon City ganap na alas-6 ng umaga.
Ayon kay SPO1 Jaime Jimena, natuklasan ni Zosimo, nakababatang kapatid ng biktima ang bangkay nang gagamit ito ng banyo. Itinali ng biktima ang nylon cord sa kisame habang nakabitin naman ang leeg.
May ilang taon nang hiwalay sa kanyang asawa ang biktima kung saan nagkaroon sila ng isang anak.
Samantala, hindi nakayanang sakit na nararanasan naman ang nakikitang motibo ng pagpapakamatay ng isang 30-anyos na lalaki sa Brgy. Vasra, Quezon City.
Ayon kay PO3 Jonathan Bustarde, ang bangkay ni Fidel Estanislao ng #10 Payatas A, Brgy. Vasra, ay nadiskubre ni Francia Estanislao habang nakasabit sa loob ng bahay gamit ang oxygen hose na itinali sa bubong.