MANILA, Philippines - Bulagta sa kalye nang barilin ng isang sekyu ng banko ang isa sa riding-in-tandem na nagtangkang mangholdap sa isa nilang depositor sa Malate, Maynila, kahapon ng umaga. Humarurot papatakas ang isa pang suspect habang kinukuyog din ng taumbayan ang nasawi na inilarawan sa edad 30-35 anyos, 5’ ang taas, nakasuot ng maong na pants at t-shirt na puti at armado ng baril. Iniimbestigahan naman ng pulisya si Joefel Olaguer, 30, nakatalaga sa Allied Bank sa naturang lugar.
Ayon sa ulat, dakong alas-9:45 ng umaga nang maganap ang nasabing insidente sa panulukan ng San Bartolome at Quirino Ave., Singalong, Malate. Papasok pa lamang umano ng banko ang di pinangalanang kliyente nito nang holdapin ng riding-in-tandem subalit mabilis na napuna ni Olaguer ang panghoholdap hanggang sa makipagputukan umano ang mga suspect. Nahulog sa motorsiklo ang suspect na binaril ni Olaguer habang naka-angkas at tumulong din ang mga tambay sa pagkuyog dito. Ludy Bermudo