MANILA, Philippines - Nasawi sa Mary Johnston Hospital ang isang 35-anyos na lalaki matapos pagtulungang saksakin ng dalawang binatilyo sa Tondo, Maynila kahapon ng madaling-araw.
Kinilala ni P/Insp. Armand Macaraeg, hepe ng Manila Police District-Homicide Section ang biktimang si Allan Torres, binata, walang trabaho at residente ng #177 San Sebastian Street sa nasabing lugar.
Hinahanting na ng pulisya ang mga suspek na itinago sa pangalang Rick at Rey na kapwa 15-anyos at nakatira sa bahagi ng Alcalde Street sa Tondo, Maynila.
Sa ulat ni SPO2 Virgo Villareal, dakong ala-1:30 ng madaling-araw nang maganap ang krimen sa bahagi ng Osmeña Street.
Nakikipag-inuman ang biktima sa kanyang mga kaibigan nang biglang lapitan at pagtulungang saksakin ng mga suspek.
Tinangka pang isalba ang buhay ng biktima subalit namatay din sa nasabing ospital.