MANILA, Philippines - Patay ang isang 3-taong gulang na batang babae makaraang aksidenteng pumutok ang pinaglaruan umano nitong baril na pag-aari ng kapitbahay nitong sundalo, kamakalawa ng gabi sa Taguig City.
Isinugod pa sa Taguig-Pateros Hospital ngunit hindi na rin umabot ng buhay sanhi ng tama ng bala ng kalibre .45 sa may kaliwang kilay ang biktimang nakilalang si Angel Ann Bunola, ng Block 137 Lot 58 Purok I, Upper Bicutan, ng naturang lungsod.
Isinailalim naman sa paraffin test ng pulisya si Petty Officer 2 Gilbert Glian, 29, miyembro ng Philippine Navy na siyang may-ari ng baril upang tiyakin kung hindi siya nagpaputok ng baril
Batay sa tinanggap na ulat ni Taguig Police chief Sr. Supt. Tomas Apolinario, naganap ang insidente dakong alas-7:25 ng gabi sa loob ng bahay ng sundalo na katabing bahay lamang ng biktima.
Naging ugali na umano ng bata na maglaro sa loob ng bahay ng sundalo, kasama ang dalawang taon niyang kapatid na si Abegail at anak ng sundalo na si Mikaela, 11.
Kararating lamang umano ng sundalo sa kanilang bahay at ipinatong ang clutch bag na kinalalagyan ng baril sa ibabaw ng isang tool box saka lumabas. Dahil sa kuryosidad, ginalaw ng biktima ang naturang clutch bag na nakita pa sa unang pagkakataon ni Mikaela at nasaway ito.
Nang makalingat, muli umanong pinakialaman ng bata ang clutch bag hanggang sa isang putok ang pumailanlang at duguang nakita ang paslit na si Angel na may tama na ng bala sa ulo.